უკრაინა საფრანგეთში პარტნიორებს ანტიბალისტიკურ პროგრამას წარუდგენს და ბალისტიკური საფრთხეებისგან დაცვის ახალი სისტემის შექმნას განიხილავს, - ამის შესახებ უკრაინის პრეზიდენტმა ვოლოდიმირ ზელენსკიმ განაცხადა.
„მთავარი პრიორიტეტი ანტიბალისტიკური თავდაცვაა. პარტნიორებს წარვუდგენთ ჩვენს ანტიბალისტიკურ პროგრამას და პირველად გავმართავთ შეხვედრას ლიდერების, ეროვნული უსაფრთხოების საკითხებში მრჩევლებისა და იმ ქვეყნების თავდაცვითი კომპანიების წარმომადგენლების დონეზე, რომლებსაც შეუძლიათ კონკრეტული ნაბიჯებით წვლილი შეიტანონ ახალი ანტიბალისტიკური სისტემის შექმნაში“, - დაწერა ზელენსკიმ Telegram-ზე.
პრეზიდენტის თქმით, საფრანგეთში ასევე გაიმართება მნიშვნელოვანი მოლაპარაკებები, რომლებმაც შესაძლოა უკრაინას თავდაცვის გაძლიერებისთვის დამატებითი შესაძლებლობები გაუხსნას.
გარდა ამისა, ზელენსკი შეხვდება საფრანგეთის პრეზიდენტ ემანუელ მაკრონის და მონაწილეობას მიიღებს „მსურველთა კოალიციის“ შეხვედრაში.
„ვიმუშავებთ იმისთვის, რომ ამ ფორმატს ახალი იმპულსი შევძინოთ“,- აღნიშნა უკრაინის პრეზიდენტმა.
ვიზიტის ფარგლებში უკრაინელი სამხედროები მონაწილეობას მიიღებენ საფრანგეთის ეროვნული დღესასწაულის - ბასტილიის აღების დღის სამხედრო აღლუმში.
უკრაინის პრეზიდენტი ვოლოდიმირ ზელენსკი 13 ივლისს პარიზში ჩავიდა.
