უკრაინის პრეზიდენტმა ვოლოდიმირ ზელენსკიმ განაცხადა, რომ ომის დასრულებისა და ცეცხლის შეწყვეტის საკითხზე შესაძლო მოლაპარაკებებში ევროპა აუცილებლად უნდა მონაწილეობდეს.
ამის შესახებ მან ტალინში, ესტონეთის პრეზიდენტ ალარ კარისთან გამართულ პრესკონფერენციაზე ისაუბრა.
ზელენსკის თქმით, მდგრადი მშვიდობისკენ პირველი ნაბიჯი ცეცხლის შეწყვეტაა, ხოლო ამის მისაღწევად საუკეთესო ფორმატი ლიდერების დონეზე შეხვედრა იქნება.
„იმისთვის, რომ ცეცხლის შეწყვეტა მოხდეს, ჩემი აზრით, უმჯობესია ლიდერების დონეზე შეხვედრა გაიმართოს. ვინ უნდა მონაწილეობდეს? რა თქმა უნდა, უკრაინა და რუსეთი, მაგრამ აუცილებლად ევროპაც. სასურველია, რომ წარმოდგენილი იყვნენ ევროპა და ამერიკის შეერთებული შტატებიც. რატომ ევროპა? იმიტომ, რომ ჩვენ ევროპაში ვართ - ეს არის პასუხი“, - განაცხადა ზელენსკიმ.
უკრაინის პრეზიდენტმა აღნიშნა, რომ ევროპული ქვეყნები ასევე განიცდიან ომის შედეგებს, მათ შორის დრონების საფრთხესაც.
„ეს ჩვენი მიწაა, ჩვენი კონტინენტია. ჩვენ დარწმუნებული უნდა ვიყოთ, რომ ხვალ უსაფრთხოდ ვიცხოვრებთ. ამიტომაც ამ ქვეყნებმა უნდა მიიღონ მონაწილეობა მოლაპარაკებებში, როგორც ამ მნიშვნელოვანი პირველი ნაბიჯის ნაწილი. უკრაინის მხრიდან ამის პოლიტიკური ნება არსებობს, ახლა ვნახოთ, არსებობს თუ არა ასეთი ნება რუსეთის მხრიდან. ჯერჯერობით მათ ეს არ უჩვენებიათ“, - დასძინა ზელენსკიმ.
