უკრაინის პრეზიდენტმა ვოლოდიმირ ზელენსკიმ განაცხადა, რომ ევროკავშირში უკრაინის გაწევრიანების საკითხთან დაკავშირებით მნიშვნელოვან პოლიტიკურ გადაწყვეტილებებს ელოდება.
ამის შესახებ ზელენსკიმ ესტონეთის პრეზიდენტ ალარ კარისთან ერთად გამართულ პრესკონფერენციაზე ისაუბრა.
მისი თქმით, უკრაინამ შეასრულა ყველა აუცილებელი მოთხოვნა, რათა ევროკავშირში გაწევრიანების მოლაპარაკებების ფარგლებში მოლაპარაკებათა ექვსივე კლასტერი გაიხსნას. ზელენსკიმ აღნიშნა, რომ ამ საკითხზე პროგრესი ევროკავშირის ლიდერების უახლოეს შეხვედრებზე გახდება ცნობილი.
„არანაირი დაბრკოლება აღარ არსებობს. მნიშვნელოვანია, რომ ეს პროგრესი შედგეს, კლასტრები გაიხსნას და რუსეთმაც დაინახოს, რომ ევროპა საკუთარ დაპირებებს ასრულებს და არ თმობს ევროპულ ინტერესებს“, - განაცხადა უკრაინის პრეზიდენტმა.
ზელენსკიმ ასევე მოუწოდა ევროკავშირს, გააძლიეროს სასანქციო ზეწოლა რუსეთზე და დაამტკიცოს სანქციების 21-ე პაკეტი.
მისი თქმით, ახალი სანქციების ერთ-ერთი მთავარი სამიზნე უნდა იყოს რუსეთის ე.წ. „ჩრდილოვანი ფლოტი“ - ტანკერებისა და სხვა გემების ქსელი, რომელსაც მოსკოვი საერთაშორისო სანქციების გვერდის ავლით ნავთობისა და სხვა რესურსების ექსპორტისთვის იყენებს.
