"ქართული დასი" სურსათის უვნებლობის, ვეტერინარიისა და მცენარეთა დაცვის ერთიანი ეროვნული სამსახურის რეგიონალური და მუნიციპალური ქსელის შექმნას ითხოვს.
ამის შესახებ პარტიის ლიდერმა, დეპუტატმა ჯონდი ბაღათურიამ დღეს, პარლამენტში სოფლის განვითარებისა და მისი დაფინანსების პროგრამის პრეზენტაციისას განაცხადა.
"აღნიშნულმა სამსახურმა უნდა უზრუნველყოს ქვეყნის ეპიზოოტიური და ფოტოსანიტარული კეთილსაიმედოობა და მეწარმეთა კონტროლის მექანიზმის გამარტივება, ე.წ. ერთი სარკმელის პრინციპით, რამაც უნდა მოხსნას მეწარმეებისთვის ბიუროკრატიული ბარიერები", - აღნიშნა ბაღათურიამ პრეზენტაციაზე.
მისივე თქმით, განსაკუთრებული ყურადღება გენმოდიფიცირებული პროდუქციის მარკირებას უნდა მიექცეს, რომელიც მოსახლეობის ინფორმირებულობასთან ერთად ხელს შეუწყობს ბაზარზე გენმოდიფიცირებული პროდუქციის ჩანაცვლებას ადგილობრივი წარმოების ეკოლოგიურად სუფთა პროდუქტით.
"ზემოთ აღნიშნული ხელს შეუწყობს ასევე სოფლის მეურნეობაში საინვესტიციო გარემოს გაუმჯობესებას, ადგილობრივი პროდუქციით იმპორტის ჩანაცვლებასა და ქვეყნის საექსპორტო პოტენციალის გაზრდას", - მიაჩნია დეპუტატს.
მისივე შეფასებით, აუცილებელია ქვეყანაში თანამედროვე ლაბორატორიული სისტემების დანერგვა, რომელიც საშუალებას იძლევა დროულად გამოავლინონ და აღმოფხვრიან ადამიანთა და ცხოველთა საერთო ინფექციური დაავადებები.
"აღნიშნული სისტემა მოდერნიზებული უნდა იყოს, რომელიც ეპიდემიოლოგიურ მონიტორინგს განახორცილებს, ასევე აუცილებელია საველე სადგურების მოწყობა. განსაკუთრებული ღონისძიებები უნდა გატარდეს ისეთ საშიში ინფექციური დაავადების წინააღმდეგ, როგორიც არის თურქული, ჯილეხი, ცოფი, ბრუცელიოზი და ტუბერკულიოზი"- აღნიშნა ბაღათურიამ.
