რუსები აგრძელებენ უკრაინის კრიტიკულ ინფრასტრუქტურასა და სამოქალაქო ობიექტებზე შეტევებს. პარასკევის ღამეს მათ 210 დრონი გუაშვეს, მათგან დაახლოებით 140 „შაჰედის“ ტიპის იყო, - ამის შესახებ უკრაინის პრეზიდენტი ვოლოდიმირ ზელენსკი წერს.
„რუსეთი აგრძელებს ჩვენს ენერგეტიკაზე, კრიტიკულ ინფრასტრუქტურასა და სამოქალაქო ობიექტებზე შეტევას. ამ ღამით 210 დრონი იყო გაშვებული, მათგან დაახლოებით 140 - „შაჰედები“. სწორედ ასეთი ყოველდღიური დარტყმები აჩვენებს, რომ საჭიროა მეტი ზეწოლა რუსეთზე. საჭიროა აგრესორის დასუსტება, რათა ევროპას მეტი უსაფრთხოება ჰქონდეს. სანქციების პოლიტიკა უნდა გაგრძელდეს და ასევე უნდა მოხდეს ყველა პარტნიორებთან სანქციის სინქრონიზაცია“, — დაწერა ზელენსკიმ.
ცნობილია, რომ ოდესაში დაბომბვის შედეგად დაშავდა ხუთი ადამიანი და გაჩნდა ხანძარი ორ სახლში, ხოლო კრივი რიჰში დაშავდა ერთი ადამიანი.
„ხარკოვის ოლქში თავს დაესხნენ სარკინიგზო ინფრასტრუქტურას, დაარტყეს ძაბვის ქვესადგურებს. დარტყმები და ვაგონებში ხანძარი დაფიქსირდა. დარტყმების შედეგად ათასობით ოჯახი ელექტროენერგიის გარეშე დარჩა. ასევე დაიბომბა სუმის და ზაპოროჟიეს ოლქები“, - განაცხადა უკრაინის პრეზიდენტმა.
მისი თქმით, უკრაინის შორ მანძილზე მოქმედი სანქციები რუსებს რეალობასთან აბრუნებს.
„ეს აბსოლუტურად სამართლიანია და რაც მთავარია ზღუდავს რუსეთის შესაძლებლობას გააგრძელოს ეს ომი. თუ რუსეთს არ სურს დიპლომატიაზე ნებაყოფლობით გადასვლა, მას ამის გაკეთება უნდა ვაიძულოთ“, - აღნიშნა მან
