უკრაინის პრეზიდენტი ვოლოდიმირ ზელენსკი რუსეთის ზავთან დაკავშირებულ ინიციატივას ეხმიანება და აცხადებს, რომ ადმინისტრაციას აშშ-ის პრეზიდენტის, დონალდ ტრამპის გუნდთან დაკავშირება და რუსული წინადადების დეტალების გარკვევა დაავალა.
„გავარკვევთ, კონკრეტულად რაზეა საუბარი - მოსკოვში აღლუმისთვის რამდენიმე საათიან უსაფრთხოებაზე თუ უფრო ფართო საკითხზე,“ - აღნიშნა უკრაინის პრეზიდენტმა.
მან ხაზი გაუსვა, რომ უკრაინა მშვიდობისკენ ისწრაფვის და უზრუნველყოფს აუცილებელ დიპლომატიურ მუშაობას ამ ომის რეალურად დასასრულებლად.
„ჩვენი წინადადებაა ცეცხლის გრძელვადიანი შეწყვეტა, ადამიანებისთვის საიმედო უსაფრთხოების გარანტიები და ხანგრძლივი მშვიდობა,“ - აღნიშნა მან და დაამატა, რომ უკრაინა მზად არის იმუშაოს ამისთვის ნებისმიერ ღირსეულ და ეფექტიან ფორმატში.
შეგახსენებთ, რუსეთის პრეზიდენტის თანაშემწემ, იური უშაკოვმა განაცხადა, რუსეთის პრეზიდენტსა და აშშ-ის პრეზიდენტს შორის სატელეფონო საუბარი შედგა. უშაკოვის თქმით, პუტინმა ტრამპს 9 მაისის აღლუმთან დაკაშირებით უკრაინაში ცეცხლის დროებითი შეწყვეტა შესთავაზა. იური უშაკოვის თქმით, ტრამპმა ინიციატივას მხარი დაუჭირა .
