უკრაინის პრეზიდენტი ვოლოდიმირ ზელენსკი გამოეხმაურა ინფორმაციას, რომლის მიხედვითაც ისრაელმა უარი თქვა გემის შეჩერებაზე, რომელიც, როგორც კიევი აცხადებს, მოპარული უკრაინული მარცვლეულით არის დატვირთული.
„მოპარული საქონლის შეძენა ყველა ნორმალურ ქვეყანაში იწვევს სამართლებრივ პასუხისმგებლობას. ეს, მათ შორის, ეხება რუსეთის მიერ გატაცებულ უკრაინულ მარცვლეულსაც. კიდევ ერთი ასეთი ტვირთით გემი შევიდა ისრაელის პორტში და გადატვირთვისთვის ემზადება. ეს არ არის და ვერ იქნება „სუფთა ბიზნესი“. ისრაელის ხელისუფლებამ არ შეიძლება არ იცოდეს, რა გემები და რა ტვირთი შედის ქვეყნის პორტებში,“ - განაცხადა ზელენსკიმ.
უკრაინის პრეზიდენტის თქმით, რუსეთი სისტემატურად იტაცებს მარცვლეულს დროებით ოკუპირებულ უკრაინულ ტერიტორიებზე და მის გატანას ორგანიზებას უწევს იმ პირების მეშვეობით, რომლებიც ოკუპანტებთან არიან დაკავშირებული.
„ასეთი გარიგებები თავად ისრაელის კანონმდებლობას არღვევს. უკრაინამ დიპლომატიური არხებით გადადგა ყველა აუცილებელი ნაბიჯი, რათა მსგავსი ინციდენტები არ განმეორდეს. თუმცა ვხედავთ, რომ მორიგი ასეთი გემიც არ შეჩერებულა“, – აღნიშნა ზელენსკიმ.
ამასთან დაკავშირებით ზელენსკიმ უკრაინის საგარეო საქმეთა სამინისტროს დაავალა, არსებული ვითარების შესახებ ინფორმაცია მიაწოდოს ქვეყნის ყველა პარტნიორს.
„უკრაინა, ჩვენი სპეცსამსახურების მიერ მოწოდებულ ინფორმაციაზე დაყრდნობით, ამზადებს შესაბამის სანქციების პაკეტს, რომელიც მოიცავს როგორც იმ პირებს, ვინც უშუალოდ ახორციელებს ამ მარცვლეულის გადაზიდვას, ასევე იმ ფიზიკურ და იურიდიულ პირებს, ვინც ცდილობს მოგების მიღებას ამგვარი კრიმინალური სქემით. ამ საკითხზე კოორდინაციას გავუწევთ ევროპელ პარტნიორებსაც, რათა შესაბამისი პირები მოხვდნენ ევროპულ სანქციების რეჟიმებში“, – დასძინა ზელენსკიმ.
მისი თქმით, უკრაინა თითოეულ სახელმწიფოსთან პარტნიორულ ურთიერთობებსა და ურთიერთპატივისცემაზეა ორიენტირებული.
„ჩვენ რეალურად ვმუშაობთ იმაზე, რომ უსაფრთხოება გაიზარდოს, მათ შორის ახლო აღმოსავლეთის რეგიონშიც. ველით, რომ ისრაელის ხელისუფლება პატივს სცემს უკრაინას და არ გადადგამს ნაბიჯებს, რომლებიც ორმხრივ ურთიერთობებს დაასუსტებს“, – განაცხადა ზელენსკიმ.
როგორც ცნობილია, უკრაინამ ისრაელის ელჩი დაიბარა ოკუპირებული ტერიტორიებიდან გატანილი მარცვლეულით დატვირთული უკვე მეორე გემის მიღების გამო. აღნიშნული გემი ჰაიფაში ჩავიდა.
ამასთან, ისრაელის საგარეო საქმეთა მინისტრმა გიდეონ საარმა აღნიშნა, რომ ბრალდებები არ წარმოადგენს მტკიცებულებებს და შესაბამისი დამადასტურებელი მასალები ისრაელის მხარისთვის არ წარუდგენიათ.
