უკრაინასა და აზერბაიჯანს შორის ურთიერთობები ძალიან მაღალ დონეზეა, - ამის შესახებ უკრაინის პრეზიდენტი, ვოლოდიმირ ზელენსკი აზერბაიჯანის პრეზიდენტთან, ილჰამ ალიევთან შეხვედრის შემდეგ სოციალურ ქსელში წერს.
ზელენსკი მადლობას უხდის აზერბაიჯანს უკრაინის სუვერენიტეტისა და ტერიტორიული მთლიანობის მხარდაჭერისთვის.
"პირველი ვიზიტი აზერბაიჯანში და ჩვენი მეშვიდე შეხვედრა ბოლო ოთხ წელზე მეტი ხნის განმავლობაში. ჩვენი ურთიერთობები ძალიან მაღალ დონეზეა და მთავარია, რომ ის ურთიერთპატივისცემაზეა დაფუძნებული. მადლობას ვუხდი აზერბაიჯანის პრეზიდენტს ილჰამ ალიევს ამ ვიზიტისთვის, ჩვენი საუბრისთვის და, რაც ყველაზე მნიშვნელოვანია, ჩვენი შეთანხმებებისთვის. დღეს უკრაინამ და აზერბაიჯანმა 6 დოკუმენტს მოაწერეს ხელი სხვადასხვა მიმართულებით.
მთავარი მიმართულებაა თავდაცვით-სამრეწველო კომპლექსი — ჩვენ განვავითარებთ და გავაძლიერებთ თანამშრომლობას. ასევე განვიხილეთ ენერგეტიკული ინიციატივების გაგრძელება და ახლის დაწყება. მადლობას ვუხდი აზერბაიჯანს ენერგეტიკული დახმარების 11 პაკეტისთვის, მათ შორის ბოლო რთული ზამთრის პერიოდში. განსაკუთრებული ყურადღება დაეთმო უკრაინის ჰუმანიტარულ მხარდაჭერას და მშვიდობის აღდგენის ძალისხმევას.
მადლობას ვუხდი აზერბაიჯანს ჩვენი სუვერენიტეტისა და ტერიტორიული მთლიანობის მხარდაჭერისთვის. ვაფასებ ღრმა თანამშრომლობის მზადყოფნას, მათ შორის თავდაცვის სფეროშიც. ჩვენ ძალიან მნიშვნელოვანი ნაბიჯი გადავდგით წინ და ახალი დოკუმენტები მალე კიდევ მოეწერება ხელს", - წერს ზელენსკი.
