16 აპრილის ღამეს დრონებით შეტევა განხორციელდა რუსეთის კრასნოდარის მხარეში, ტუაფსეში მდებარე ნავთობგადამამუშავებელ ქარხანას.
შედეგად, საწარმოს ტერიტორიაზე ნავთობით სავსე რამდენიმე რეზერვუარი დაიწვა. ადგილობრივი მცხოვრებლები სოციალურ ქსელებში წერდნენ ძლიერი აფეთქებების შესახებ. მოგვიანებით ადგილობრივმა ხელისუფლებამ დაადასტურა შეტევა ნავთობგადამამუშავებელ ქარხანაზე. ასევე გავრცელდა ინფორმაცია პორტის ტერიტორიაზე ნამსხვრევების ჩამოვარდნის შესახებ.
დილით ადგილობრივმა ხელისუფლებამ განაცხადა, რომ ტუაფსეს ყველა საგანმანათლებლო დაწესებულებაში დღეს სწავლა გაუქმდა.
ადგილობრივი მოსახლეობის ცნობით, შეტევის შედეგად ტუაფსეს ნავთობგადამამუშავებელ ქარხანაში სულ მცირე სამი რეზერვუარი დაიწვა.
რუსეთის თავდაცვის სამინისტრომ განაცხადა, რომ გაანადგურა 207 დრონი ბელგოროდის, სმოლენსკის, კურსკის, ბრიანსკის, ორიოლის ოლქებში, ასევე კრასნოდარის მხარეში, ანექსირებულ ყირიმში, და შავი და აზოვის ზღვების აკვატორიებში.
ტუაფსეს ნავთობგადამამუშავებელი ქარხანა წარმოადგენს ერთიან საწარმოო კომპლექსს ზღვის ტერმინალთან — კომპანია „რ.ნ.-მორსკოი ტერმინალ ტუაფსე“-სთან. ეს არის ერთ-ერთი უდიდესი ნავთობგადამამუშავებელი ქარხანა რუსეთში, რომელიც სპეციალიზებულია ნავთობის პირველადი გადამუშავებაზე და შედის კომპანია „როსნეფტის“ სტრუქტურაში.
ქარხნის წლიური გადამუშავების სიმძლავრე დაახლოებით 12 მილიონ ტონას შეადგენს. მისი ძირითადი პროდუქციაა ნავთობის დისტილატები, მაზუთი, დიზელის საწვავი და საავიაციო საწვავი, რომელთა დაახლოებით 90% ექსპორტზე გადის.
