იუსტიციის მინისტრის მოადგილის გიორგი ვაშაძის განცხადებით, საზოგადოებრივად სასარგებლო შრომის მექანიზმის დანერგვა დამნაშავის ფსიქოლოგიურ გაჯანსაღებაზე ორიენტირებული პროექტია.
"ინიციატივა, რომელსაც მთავრობა დღევანდლე სხდომაზე განიხილავს, რამდენიმე მიზეზით არის განპირობებული. პირველი - პრევენცია, მეორე- დამნაშავის სოციალიზაცია და რეაბილიტაცია, რათა მან შეძლოს საზოგადოებაში ნორმალური თანაცხოვრება განაგრძოს. ეს არის პირის ფსიქოლოგიურ გაჯანსაღებაზე ორიენტირებული პროექტი, რაც სისხლის სამართლის ლიბერალიზაციის შემადგენელი ნაწილია,"- განუცხადა ვაშაძემ მთავრობის დღევანდელი სხდომის დაწყების წინ ჟურნალისტებს.
მისივე განმარტებით, ნაკლებად მძიმე დანაშაულის ჩამდენი პირები სასჯელთაღსრულებით დაწესებულებებში პატიმრობის ნაცვლად თავდაპირველად საზოგადოებრივად სასარგებლო საქმიანობას ადგილობირვი თვითმმართველობის ადგილებში შეასრულებენ. შემდეგ კი მათ დასაქმების არეალი უფრო გაფართოვდება.
"თავად სასჯელთაღსრულების სამინისტროც გეგმავს ამ ადამიანებისთვის სამუშაო ადგილების შექმნას", - განმარტა ვაშაძემ.
აღსანიშნავია, რომ საზოგადოებრივად სასარგებლო შრომის მექანიზმი გაზაფხულიდან ამოქმედდება.
შეგახსენებთ რომ ცვლილებები "სისხლის სამართლის კოდექსსა" და "არასაპატიმრო, სასჯელთაღსრულებათა და პრობაციის" კანონში შედის, რომლის თანახმადაც ნაკლებად მძიმე დანაშაულის ჩამდენი პირი სასჯელს არა სასჯელთაღსურლბით დაწესებულებაში მოიხდის, არამედ მათ საზოგადოებრივად სასარგებლო საქმიანობა დაევალებათ და დანაშაულს სწორედ ამ ფორმით აანაზღაურებენ.
კანონპროქტს მთავრობა დღევანდელ სხდომაზე განიხილავს, რის შემდეგაც ის პარლამენტს გადაეგზავნება.