საქართველოს უნივერსიტეტში, იუსტიციის მინისტრის მოადგილემ გიორგი ვაშაძემ სამოქალაქო რეესტრში განხორციელებული რეფორმების, იუსტიციის სახლების კონცეფციისა და ID ბარათების პროექტის პრეზენტაცია გამართა.
ღონისძიებას საქართველოს უნივერსიტეტის რექტორი მანანა სანაძე, პროფესსორ-მასწავლებლები, სტუდენტები, სამართლის სკოლის ხელმძღვანელი სულხან გამყრელიძე ესწრებოდნენ.
როგორც გიორგი ვაშაძემ განაცხადა, იუსტიციის სამინისტროს სამოქალაქო რეესტრი 2006 წელს შეიქმნა. ხუთი წლის წინ უწყებამ მუშაობა მხოლოდ ხუთი კომპიუტერით დაიწყო. ამჟამად რეესტრის ყველა ტერიტორიული სამსახური ტექნიკურად სრულად აქვს აღჭურვილი.
სამოქალაქო რეესტრში არაერთი ფართომასშტაბური პროექტი განხორციელდა: დაიწყო ბიომეტრული პასპორტების გაცემა, მოქალაქეებს საშუალება აქვთ მსოფლიოს ნებისმიერი წერტილიდან, სახლიდან გაუსვლელად, ონლაინ რეჟიმში მიიღონ პასპორტები, განმეორებითი მოწმობები და სხვა დოკუმენტები, დაიწყო მუშაობა ე.წ. საუკუნის - დამისამართების პროექტზე და სხვა.
სამოქალაქო რეესტრი მიმდინარე წელს მუშაობის სრულიად ახალ ეტაპზე გადადის. 2011 წლის ზაფხულიდან საქართველოში ელექტრონული პირადობის მოწმობების გაცემა იწყება. ID ბარათები არსებითად შეცვლის სახელმწიფო და კერძო სექტორის ურთიერთობას მოქალაქეებთან.
ახალი მოწმობა პლასტიკური ბარათის ტიპის იქნება, რომელიც მომავალში ჩაანაცვლებს ძალიან ბევრ დოკუმენტს.
ახალი პროექტი მოქალაქისთვის სერვისის მიწოდების პრაქტიკას მთლიანად შეცვლის: თუ აქამდე ადამიანს ამა თუ იმ მომსახურების მისაღებად სხვადასხვა კერძო თუ სახელმწიფო უწყებებში მისვლა უწევს, მომავალში მას შეეძლება ონლაინ რეჟიმში - კომპიუტერის მეშვეობით მოაწეროს ხელი დოკუმენტს, გააგზავნოს ელექტრონული ფოსტით, რასაც უკვე ოფიციალური ძალა ექნება. ეს თავის მხრივ, სახელმწიფო დანახარჯებს მნიშვნელოვნად შეამცირებს.
აღსანიშნავია, რომ იუსტიციის სამინისტროში მუშავდება სრულიად ახალი კონცეფცია - იქმნება იუსტიციის სახლები, სადაც მოქალაქეს ერთ სივრცეში შეეძლება სახელმწიფო სექტორში არსებული სერვისების მიღება. გარდა ამისა, ამავე სახლებში იქნება განთავსებული კერძო სექტორიც.
როგორც საქართველოს უნივერსიტეტის რექტორმა მანანა სანაძემ განაცხადა, ეს შეხვედრა ძალიან სასარგებლო იყო სტუდენტებისთვის, რადგან მათ უამრავი ახალი სერვისისა და პროექტის შესახებ დეტალური ინფორმაცია უშუალოდ იუსტიციის მინისტრის მოადგილისგან მიიღეს.
`სამართლის სკოლა და საქართველოს უნივერსიტეტის ფაკულტეტები ყოველკვირეულად სტუდენტებისთვის სემინარებს ატარებენ, ცნობილი და წარმატებული ადამიანები უწყების მიღწევებზე საუბრობენ, რაც სასწავლებლის სტუდენტების სამომავლო საქმიანობისთვის მნიშვნელოვანია,~- განაცხადა სანაძემ.
შეხვედრის ბოლოს წარმოდგენილ თემებზე დისკუსია გაიმართა. სტუდენტები ძირითადად ID ბარათების უსაფრთხოების სტანდარტებისა და სამოქალაქო რეესტრში დასაქმების თემებით დაინტერესდნენ.