ჰელსინკის კომისიას უკვე ამერიკაში აღარ უსმენენ, მით უმეტეს, საჯაროდ აღიარებულია, რომ თორნტონი არის თავისი ქვეყნის პრეზიდენტის მაგინებელი ადამიანი, რომელსაც საქართველო ეზიზღება, - ამის შესახებ პარტია „ხალხის ძალის“ აღმასრულებელმა მდივანმა, გურამ მაჭარაშვილმა განაცხადა.
„რაც შეეხება „ფასიან განცხადებებს“, რასაც თორნტონი აკეთებდა, ყველამ კარგად დაინახა, რომ თავადვე უარყო თავისივე განცხადება. ამბობს, საქართველოში ვითომ მკაცრ კანონებს იღებენ, თუმცა თავადვე აღნიშნავს, გრანტების თაობაზე მსგავსი კანონების მიღება რატომ გვიწევს. გადაწყვეტილი აქვთ, კანონმდებლობის გვერდის ავლით საქართველოში შავი ფული შემოიტანონ. შემდეგ უკვირს, ისეთ კანონებს რატომ ვიღებთ, ქართულ პოლიტიკაში შავი ფული რომ არ შემოვიდეს. ეს არის მისი „ლოგიკა“. დაბოღმილი ადამიანისგან ჯანსაღ განცხადებებს ვერ მოისმენ. თურმე, ამერიკას და ევროპას სჭირდებათ, რომ იქ უცხოური ძალა არ ჩაერიოს, საქართველოს კი, რატომღაც ეს არ სჭირდება. თავად თქვეს, გზებს ვეძებთ, რომ საქართველოში კანონმდებლობის გვერდის ავლით შავი ფული შევიტანოთო. ეს ფული სჭირდებათ, რომ „მოლოტოვის კოქტეილები“ იყიდონ, პოლიციელები დაწვან, პარლამენტში შევარდნენ. კომისიაზე თქვა, ამისთვის საქართველოში შავ ფულს შევიტანთო, შემდეგ აპროტესტებდა, შავი ფულის შემოტანის კანონმდებლობას რატომ იღებენ და საშუალებას არ გვაძლევენ, შავი ფული შევიტანოთო. ძალიან წუხს, რომ USAID-ი თავზე ჩამოენგრა. მხოლოდ ეს ორგანიზაცია კი არ ჩამოინგრევა, ჩამოინგრევა ყველა ინსტიტუტი სიმართლის პრინციპიდან გამომდინარე“, - განაცხადა გურამ მაჭარაშვილმა.
ჰელსინკის კომისიაში საქართველოსთან დაკავშირებით მოსმენა გაიმართა. ერთ-ერთი მომხსენებელი იყო „მაკკეინის ინსტიტუტის“ გლობალური დემოკრატიის პროგრამების დირექტორი ლორა თორნტონი. "ბევრი ფიქრობს, რომ საქართველოს დემოკრატიული უკუსვლა სულ ახლახან დაიწყო და სწრაფი ტემპით მიმდინარეობს, თუმცა მე ვიტყოდი, რომ ნიშნები საკმაოდ დიდი ხნის წინ გამოჩნდა“, - განაცხადა თორნტონმა.
