"რუსეთთან ომით სააკაშვილმა პოლიტიკური არსებობა გაიხანგრძლივა", - განაცხადა "ქართული პარტიის" ლიდერმა სოზარ სუბარმა პარტიის ხარაგაულის რაიონული ორგანიზაციის ოფისის გახსნაზე.
"ომის შემდეგ ქვეყანამ ოთხნახევარმილიარდიანი დახმარება მიიღო, რომელიც თითქმის მთლიანად მისი ხელისუფლების შენარჩუნებას მოხმარდა. უცხოური კრედიტებით სააკაშვილი ქვეყნის სათავეში ყოფნას იხანგრძლივებს, მაგრამ ეს უკვალოდ არ ჩაივლის. უკვე ახლო მომავალში საქართველოს უზარმაზარი თანხა ექნება გადასახდელი საგარეო ვალის დასაფარად და ეს პროცესი რიგით მოქალაქეებს დააწვება ტვირთად", - დასძინა მან.
სუბარი ხელისუფლების უგუნურ პოლიტიკას მიაწერს იმას, რომ ადამიანების უდიდესი ნაწილი უკიდურეს გაჭირვებაში ცხოვრობს და ამის გამო იზრდება მიგრაცია.
მისი თქმით, ძალიან ბევრი მოქალაქე იძულებულია საცხოვრებელი ადგილი დატოვოს და ლუკმაპურის საშოვნელად უცხოეთში გადაიხვეწოს.
"უცხო ქვეყანაში გაქცეული ქართველები არალეგალურად ცხოვრობენ. ბევრი მათგანი დანაშაულებრივ გზას ადგება და ციხეებში ხვდება", - განმარტა სუბარმა. ნათქვამის საილუსტრაციოდ მან ავსტრიის ციხეების მაგალითი მოიყვანა, სადაც პატიმრების თითქმის მესამედი ქართველები არიან.
