კოსოვოში ბოლო 11 თვის განმავლობაში მეორედ იმართება ვადამდელი საპარლამენტო არჩევნები, რადგან ნაციონალისტი პრემიერ-მინისტრი ალბინ კურტის პარტია ერთწლიანი პოლიტიკური ჩიხის დასასრულებლად უმრავლესობის მოპოვებას ცდილობს.

საარჩევო უბნები ადგილობრივი დროით დილის 7 საათზე აიხსნა და საღამოს 7 საათზე დაიხურება. ეგზიტპოლის შედეგები ხმის მიცემის დასრულებისთანავე გამოქვეყნდება.

საპარლამენტო ვადამდელი არჩევნები მას შემდეგ დაინიშნა, რაც პრემიერ-მინისტრ ალბინ კურტის „თვითგამორკვევის მოძრაობამ“ ვერ შეძლო მთავრობის ფორმირება, მიუხედავად იმისა, რომ 9 თებერვლის არჩევნებში ყველაზე მეტი ხმა მოიპოვა.

მრავალთვიანი წარუმატებელი კოალიციური მოლაპარაკებების შედეგად, პრეზიდენტმა ვიოსა ოსმანმა ნოემბერში პარლამენტი დაითხოვა და ვადამდელი არჩევნები დანიშნა.
კოსოვოს ოპოზიციურმა პარტიებმა უარი თქვეს კურტისთან ერთად მთავრობის ფორმირებაზე, გააკრიტიკეს რა მისი მიდგომა დასავლელ მოკავშირეებთან ურთიერთობებსა და კოსოვოს ჩრდილოეთ რეგიონის მიმართ, სადაც სერბული უმცირესობა ცხოვრობს.

მთავრობის ჩამოყალიბების მორიგი წარუმატებელი მცდელობა კროსოვოში არსებულ კრიზისს გაახანგრძლივებს. კანონმდებლებმა აპრილში ახალი პრეზიდეტი უნდა აირჩიონ და ევროკავშირსა და მსოფლიო ბანკთან გაფორმებული 1 მილიარდი ევროს ოდენობის სესხის ხელშეკრულებების რატიფიცირება მოახდინონ, რომელთა ვადაც მომდევნო თვეებში იწურება.

საერთაშორისო მხარდაჭერის მიუხედავად, 1.6 მილიონიანი ქვეყანა სიღარიბეს, არასტაბილურობასა და ორგანიზებულ დანაშაულს ებრძვის.

ამომრჩევლის მისამხრობად, კურტი საჯარო სექტორის თანამშრომლებისთვის დამატებითი ხელფასის, კაპიტალური ინვესტიციების სახით წელიწადში 1 მილიარდი ევროს გამოყოფისა და ორგანიზებულ დანაშაულთან საბრძოლველად პროკურატურის ახალი დანაყოფის შექმნა დაპირებით გამოვიდა.

კოსოვოში საზოგადოებრივი აზრის გამოკითხვის შედეგები არ გამოქვეყნებულა, რაც შედეგებს გაურკვეველს ხდის. ბევრი ამომრჩეველი ამბობს, რომ იმედგაცრუებულია.

ყოფილმა სერბულმა პროვინციამ, კოსოვომ, ბელგრადისგან დამოუკიდებლობა 2008 წელს გამოაცხადა. თუმცა, რამდენიმე ქვეყანა, მათ შორის სერბეთი, რუსეთი და ევროკავშირის ხუთი წევრი სახელმწიფო - ესპანეთი, კვიპროსი, საბერძნეთი, სლოვაკეთი და რუმინეთი - არ ცნობს კოსოვოს სახელმწიფოებრიობას.