გერმანიის კანცლერმა ფრიდრიხ მერცმა განაცხდა, რომ რუსეთის პრეზიდენტის ვლადიმირ პუტინის აგრესიული საგარეო პოლიტიკა უკრაინაზე არ შეჩერდება.
მერცმა განაცხადა, რომ პუტინი დაინტერესებულია „ევროპაში საზღვრების ფუნდამენტური შეცვლით“ და საბჭოთა კავშირის აღდგენით მის ყოფილ საზღვრებში.
მისი აზრით, ეს წარმოადგენს „უზარმაზარ საფრთხეს, მათ შორის სამხედრო საფრთხეს, იმ ქვეყნებისთვის, რომლებიც ოდესღაც ამ იმპერიის ნაწილი იყვნენ“.
„პუტინი არ გაჩერდება. უკრაინა თუ დაეცემა, ის არ გაჩერდება“, - განაცხადა მერცმა.
მისი თქმით, ამიტომ, უკრაინისთვის შემდგომი დახმარება და ევროპის ერთიანობა ბრიტანეთთან სტრატეგიულ თანამშრომლობაში საგარეო და უსაფრთხოების პოლიტიკის პრიორიტეტებია. ასევე მნიშვნელოვანია „ნატო-ს რაც შეიძლება დიდხანს შენარჩუნება“, რომლის ეფექტურობაც აშშ-ის პრეზიდენტმა დონალდ ტრამპმა არაერთხელ დასვა კითხვის ნიშნის ქვეშ.
რუსეთის მიმართ პოლიტიკის თვალსაზრისით, მერცი მიიჩნევს, რომ რამდენიმე სახელმწიფოს ნაჩქარევი ჩართვა პირველ მსოფლიო ომში 1914 წელს არასწორი ისტორიული ანალოგიაა.
„ალბათ უფრო სწორი იქნებოდა 1938 წლის ისტორიულ ანალოგიად გამოყენება“, - აღნიშნა მერცმა.
მერცის თქმით, მიუნხენის შეთანხმების შემდეგ, ადოლფ ჰიტლერმა დაინახა, რომ მისი იმპერიული ექსპანსიონისტური ამბიციები ძლიერდებოდა ევროპული სახელმწიფოების დამშვიდების პოლიტიკით და ერთი წლის შემდეგ მან მეორე მსოფლიო ომი დაიწყო.
რესპუბლიკელმა კონგრესმენმა დონ ბეიკონმა განაცხადა, რომ უკრაინის იძულება, დათმოს თავისი ტერიტორია სამშვიდობო შეთანხმებისთვის, 1938 წლის „მიუნხენის შეთქმულების“ სიტუაციას მოგვაგონებს.
მანამდე, მენის შტატის დამოუკიდებელმა სენატორმა ანგუს კინგმა ამერიკული ადმინისტრაციის სამშვიდობო გეგმის წინადადება შეადარა მიუნხენის შეთანხმებას, რომელიც დაიდო ბრიტანეთის პრემიერ-მინისტრ ნევილ ჩემბერლენსა და ადოლფ ჰიტლერს შორის 1938 წელს და რომელიც დამშვიდების ისტორიულ წარუმატებლობად იქცა.
