"ცხადია, საქართველოში ადამიანის უფლებების დაცვის კუთხით უმწვავესი პრობლემებია. შესაბამისად, ბოლო პერიოდში სულ უფრო ხშირად აკრიტიკებენ საქართველოს ხელისუფლებას საერთაშორისო სტრუქტურები. შემთხვევითი არ არის გაეროს 163 რეკომენდაცია, რომლითაც ფაქტობრივად მწვავედაა გაკრიტიკებულოი საქართველოში ადამიანის უფლებათა დაცვის საკითხი", - განუცხადა ბესელიამ "ჯი-ეიჩ-ენს".

ის "ცინიკურად" და "უპასუხისმგებლობად" აფასებს ქართული მხარის მიერ იმ რეკომენდაციის შესრულებაზე უარის თქმას, რომელიც ადმინისტრაციული კოდექსით დადგენილი პატიმრობის 90-დღიანი ვადის შემცირებას შეეხება.

"ცინიკური და უპასუხისმგებლოა ქართული მხარის მტკიცება, რომ არ უნდა შემცირდეს ადმინისტრაციული კოდექსით დადგენილი პატიმრობის 90-დღიანი ვადა. ანალოგიური რეკომნადციები ჰქონდა ვენეციის კომისიას. ამით ხელისუფლება აღიარებს, რომ რეპრესიული პოლიტიკის გატარებაზე უარს არ ამბობს. კრიტიკას ვერ უძლებს პატიმართა რაოდენობის ზრდა და მათდამი მოპყრობის სისასტიკე. საქართველო მსოფლიოში სამეულშია პატიმართა რაოდენობის მიხედვით.ხოლო სასამართლოს პოლიტიზირების დამადასტურებელია 2010 წელს გამამართლებელი განაჩენების 0,01 %", - განუმარტა აღნიშნული მოძრაობის ლიდერმა "ჯი-ეიჩ-ენს".

შეგახსენებთ, რომ გაერომ საქართველოს 163 რეკომენდაცია მისცა (ადამიანის უფლებათა საბჭოს უნივერსალური პერიოდული მიმოხილვის ფარგლებში, 1-ელ თებერვალს, ჟენევაში გამართულ მე-10 სესიაზე), რომლებიც ძირითადად როგორც უბრალო მოქალაქეების, ისე ჟურნალისტების, დევნილების, ეთნიკური უმცირესობის თუ პატიმრების... უფლებების დაცვას შეეხება. ქართული დელეგაციის ხელმძღვანელმა სერგი კაპანაძემ სხდომაზევე განაცხადა, რომ საქართველო 5 რეკომენდაციას არ შეასრულებს, მათ შორის ერთ-ერთი ადმინისტრაციული სამართალდარღვევისთვის კანონმდებლობით დადგენილი წინასწარი დაკავების 90-დღიანი ვადის 60-დღემდე შემცირებას შეეხება. რაც შეეხება კიდევ ერთ რეკომენდაციას, რომლის შესრულებასაც თბილისი გამორიცხავს, "საქართველოს მიერ უმცირესობათა ჯგუფებისგან მტრის ხატის შექმნაზე უარის თქმაა", რაც კაპანაძის განმარტებით, ვერ შესრულდება, ვინაიდან ასეთი რამ საქართველოში არ ხდება.