სასჯელაღსრულების, პრობაციისა და იურიდიული დახმარების მინისტრი ხათუნა კალმახელიძე პატიმრების გარდაცვალებაში განსაკუთრებულს ვერაფერს ხედავს.
ამის შესახებ კალმახელიძემ დღეს პარლამენტის ადამიანის უფლებათა და იურიდიულ საკითხთა კომიტეტების გაერთიანებულ სხდომაზე ოპოზიციონერი დეპუტატის გია ცაგარეიშვილის კითხვაზე განაცხადა.
"ადამიანების ყველგან კვდებიან, ციხეშიც და გარეთაც და ამაში განსაკუთრებული არაფერია. პატიმრების გარდაცვალების მიზეზი, ძირითადად, ასაკია", - აღნიშნა კალმახელიძემ.
მინისტრის თქმით, პენიტენციალურ სისტემაში ასევე დიდი ყურადღება ექცევა სამედიცინო მომსახურების ხარისხს და ხელმისაწვდომობას.
რაც შეეხებათ ტუბერკულოზით დაავადებულ პატიმრებს, კალმახელიძის თქმით, მიმდინარე წლის ბოლოს ან 2012 წლის დასაწყისში მათ სამკურნალოდ კიდევ ერთი კორპუსი აშენდება და ძველის სრული რეაბილიტაცია მოხდება.
"ტუბერკულოზით დავადება პრობლემაა არა მხოლოდ ციხეებში ასევე მის გარეთაც, ამიტომ ჩვენ ჩართულები ვართ ეროვნულ პროგრამაში და ამ გეგმით ხორციელდება პატიმრების მკურნალობაც. თუმცა უნდა ითქვას, რომ ეს დაავადება არა მხოლოდ ჩვენ, ასევე ევროპის ციხეებში ფართოდ არის გავრცელებული და პრობლემას წარმოადგენს", - განაცხადა მინისტრმა.
