აშშ-ის პრეზიდენტის სპეციალურმა წარმომადგენელმა კიტ კელოგმა და აშშ-ის სახელმწიფო მდივანმა მარკო რუბიომ გადამწყვეტი როლი შეასრულეს რუსეთისა და უკრაინის მიმართ დონალდ ტრამპის პოზიციის შეცვლაში. ამის შესახებ The Telegraph წყაროებზე დაყრდნობით წერს.
თუმცა, მიუხედავად იმისა, რომ ამ გადაწყვეტილებას ზოგიერთი იმ ფაქტს უკავშირებს, რომ ტრამპი ვლადიმირ პუტინის მიმართ დღითიდღე უკმაყოფილო ხდებოდა, Telegraph აშშ-ს კონგრესიდან წყაროებზე დაყრდნობით წერს, რომ ამის პარალელურად ტრამპის ადმინისტრაციის რესპუბლიკელი "ქორები" თვეების განმავლობაში მუშაობდნენ, რომ ტრამპი რუსეთის წინააღმდეგ უფრო მკაცრი ნაბიჯების გადადგმაში დაერწმუნებინათ.
კელოგი კვლავ აგრძელებდა ამერიკელი შუამავლის როლს უკრაინასთან კონტაქტებში, თუმცა შეწყვიტა აშშ-ის ოფიციალურ პირებსა და მოსკოვს შორის პირდაპირ მოლაპარაკებებში მონაწილეობა.
თუმცა, ბოლო კვირების განმავლობაში სიტუაცია შეიცვალა. წყარომ The Telegraph-ს განუცხადა, რომ კელოგი ახლა „აღმავლობის გზაზეა“.
The Telegraph-ი აღნიშნავს, რომ თანამდებობაზე დანიშვნის შემდეგ რუბიომ, დიდი ხნის განმავლობაში მკაცრი საგარეო პოლიტიკის დამცველმა, რომელმაც ერთხელ რუსეთის პრეზიდენტ ვლადიმირ პუტინს „განგსტერი“ უწოდა, მოსკოვის მიმართ უფრო შემრიგებლური ტონი დაიკავა.
ამავდროულად, გაზეთის ერთ-ერთი წყაროს ცნობით, რუბიოს ტრამპთან ახლო ურთიერთობამ მას ჩარევის საშუალება მისცა, რადგან პუტინმა ბოლო კვირების განმავლობაში უკრაინაზე თავდასხმები გააძლიერა.
14 ივლისს, პრეზიდენტმა დონალდ ტრამპმა გამოაცხადა, რომ აშშ დრამატულად გაზრდის ევროპელი მოკავშირეებისთვის შეიარაღების მიწოდებას, ეს ქვეყნები კი იარაღს შემდგომ უკრაინაში გაგზავნიან. მან ასევე რუსეთს 50-დღიანი ვადა მისცა შეთანხმების მისაღწევად, წინააღმდეგ შემთხვევაში კი კრემლს 100%-იანი "მეორადი ტარიფებით" დაემუქრა, რაც რუსული ნავთობის შემსყიდველ ისეთ ქვეყნებზე ტარიფების დაწესებას გულისხმობს, როგორებიც არიან ჩინეთი და ინდოეთი.
