ტყიბულის მაღაროელების პროფკავშირული ორგანიზაცია და საქართველოს მეტალურგიული, სამთო და ქიმიური მრეწველობის მუშაკთა პროფესიული კავშირი გაფიცვისთვის ემზადება.
გამაფრთხილებელი ორსაათიანი გაფიცვა დღეს, 31 იანვარს, 12:00 საათზე შპს ,,საქნახშირის" (ჯი-აი-ჯი ჯგუფის) ტყიბულის მაღაროს თანამშრომელთა მიერ განხორციელდება.
როგორც საქართველოს მეტალურგიული, სამთო და ქიმიური მრეწველობის მუშაკთა პროფესიული კავშირში განმარტავენ, საქართველოს შრომის კოდექსის შესაბამისად სპეციალური წერილი საგაფიცვო პროცედურის დაწყების შესახებ შპს "საქნახშირის" ხელმძღვანელებს უკვე გადაეგზავნათ.
2 საათიანი გაფიცვით ტყიბულის მაღაროების თანამშრომელები ხელმძღვანელობას მოთხოვნების შესრულებისკენ მოუწოდებენ, წინააღმდგე შემთხვევაში კი მასშტაბურ გაფიცვას გამართავენ.
მაღაროელების მოთხოვნებია: შპს ,,საქნახშირის" დასაქმებულთათვის გაფორმდეს უვადო შრომითი კონტრაქტები;
მოხდეს შპს ,,საქნახშირის" თანამშრომელთა ხელფასების ინდექსაცია ბოლო სამი წლის მანძილზე დაფიქსირებული ინფლაციისა და სამომხმარებლო პროდუქტებსა და მედიკამენტებზე ფასების მომატების მიხედვით, რაზეც მზად ვართ ვიმუშავოთ თქვენთან ერთად კომისიური წესით;
2010 და 2011 წლებში შახტაზე მომხდარი აფეთქებების შედეგად დაღუპული და დასახიჩრებული მეშახტეების მიერ ბანკებიდან აღებული სესხების, განვადებების, ოვერდრაფტებისა თუ საკრედიტო ბარათების ღირებულების გადახდა მოხდეს შპს ,,საქნახშირის" ადმინისტრაციის მიერ;
გაუმჯობესდეს შპს ,,საქნახშირის" დასაქმებულთა შრომის პირობები, რომელშიც იგულისხმება: შრომის უსაფრთხოების თანამედროვე სისტემების დანერგვა ,,საქართველოს პროფესიული კავშირების გაერთიანებასთან" ერთად და მის შესრულებაზე ორმხრივი მონიტორინგის განხორციელება;
დასაქმებულების რეგულარული უზრუნველყოფა ხარისხიანი სპეცტანსაცმლით, სპეცფეხსაცმლით, დამხმარე და დამცავი საშუალებებით;
დასაქმებულთა დროული და რეგულარული უზრუნველყოფა ხარისხიანი სამუშაო იარაღებით და საჭირო მასალებით; გასახდელების, აბანოების, სპეცტანსაცმლის სამრეცხაოს და სველი წერტილების წესრიგში მოყვანა დასაქმებულთა რაოდენობისა და ქვეყანაში არსებული სტანდარტების გათვალისწინებით;
დასაქმებულის სამსახურეობრივი მოვალეობის შესრულების მომენტში დასახიჩრების ან დაღუპვის შემთხვევაში, ფაქტის გამოკვლევის პროცესებში საქართველოს პროფესიული კავშირების გაერთიანების შრომის ტექნიკური ინსპექტორების ჩართვა.
გარდა ამისა, პროფკავშირების მოთხოვნებია: ღამის პერიოდში (22:00-დან 06:00-მდე), ზეგანაკვეთურ და სადღესასწაულო დღეებში ნამუშევარი საათების ანაზღაურების განსხვავებული სატარიფო სისტემის შემოღების შესახებ მოლაპარაკებების დაწყება;
ჯანმრთელობისთვის მავნე და საშიშპირობებიანი სამუშაოების შესრულებასთან დაკავშირებით კომპენსაციების სისტემის შემოღების შესახებ მოლაპარაკებების დაწყება;
დასაქმებულთა კუთვნილი, ანაზღაურებადი შვებულება განისაზღვროს 40 სამუშაო დღით;
სამუშაოზე დასახიჩრებულთა, ტრავმირებულთა, შრომისუნარ დაკარგულთა და დაღუპულთა ოჯახებისათვის საპენსიო და საკომპენსაციო სისტემის შემოღება;
დასაქმებულთა სამგზავრო ტრანსპორტით უზრუნველყოფასთან დაკავშირებით მოლაპარაკებების დაწყება;
,,საქართველოს პროფესიული კავშირების გაერთიანებისა" და ,,საქართველოს მეტალურგიული, სამთო და ქიმიური მრეწველობის მუშაკთა პროფესიული კავშირის", როგორც დასაქმებულთა ლეგიტიმურ წარმომადგენლებთან კოლექტიური მოლაპარაკებების დაწყება ყველა ზემოთჩამოთვლილ საკითხებთან დაკავშირებით;
პროფკავშირების მოთხოვნაა, ყველა ზემოთ ჩამოთვლილ პროცესზე მონიტორინგი განხორციელდეს საქართველოს პროფესიული კავშირების გაერთიანებასთან ერთად.
