თბილისის კორპუსი უქმდება და მისი ფუნქცია გამგეობებს გადაუნაწილდება. როგორც „ჯი-ეიჩ-ენთან" კომენტირებისას საკრებულოს ქონების მართვისა და საფინანსო-საბიუჯეტო კომისიის თავმჯდომარემ თამაზ შოშიაშვილმა აღნიშნა, ამ გადაწყვეტილებას შემცირებები არ მოჰყოლია. თბილისის კორპუსის თანამშრომლები გადანაწილებულები არიან საქალაქო სისტემაში, ნაწილი_ რაიონულ გამგეობებში ან მერიაში.
მისი თქმით, ყველა უბანში არსებული გამგეობის წარმომადგენლობებს, ე. წ. მუნიციპალიტეტებს (სულ 30 მუნიციპალიტეტია) მოსახლეობასთან უფრო მეტი კონტაქტი აქვთ. ამ მიზნით გადაწყდა, რომ შესაბამისი თანხები რაიონულ გამგეობებში გადანაწილებულიყო.
„ბუნებრივია, ამით ბიუჯეტში არაფერი შემცირებულა. პირიქით, 2011 წელს სამი მილიონი ლარით მეტია გათვალისწინებული, ვიდრე იყო 2010-ში. ის პროგრამები, რაც 2006 წლიდან გვქონდა დაგეგმილი, ისევ ძალაშია. ამასთან, თანხებიც გადავანაწილეთ რაიონული გამგეობების ბიუჯეტებში,"_აღნიშნა შოშიაშვილმა.
გარდა ამისა, საკრებულოს დღვანდელ სხდომაზევე გადაწყდა, რომ მერიის სტრუქტურას დაემატება იურიდიული საქალაქო სამსახური თავისი უფროსით.