ოპოზიციონერი დეპუტატი გიორგი ცაგარეიშვილი პრეზიდენტის ყოველწლიური მოხსენებისას სიტყვით გამოსვლას ითხოვს. დეპუტატმა შესაბამისი თხოვნით პარლამენტის თავმჯდომარეს დავით ბაქრაძეს წერილით დღეს მიმართა.
პრეზიდენტის მოხსენებისას დეპუტატების გამოსვლას რეგლამენტი ადგენს და ამის უფლება მხოლოდ ფრაქციების თავმჯდომარეებს ეძლევა. ცალკეული დეპუტატებისთვის სიტყვით გამოსვლის უფლება კი, პარლამენტის ბიურომ უნდა განსაზღვროს.
"იმედია, გაითვალისწინებთ ჩემს მომართვას, რათა ვამცნო საზოგადოებას ჩემი და "თავისუფალი დემოკრატების" შეხედულებები", - დასძენს გიორგი ცაგარეიშვილი პარლამენტის თავმჯდომარისადმი მიმართულ წერილში.
შეგახსენებთ, რომ საქართველოს კონსტიტუციის თანახმად, საქართველოს პრეზიდენტი პარლამენტის წინაშე ყოველ წლიურად გამოდის და დეპუტატებს ანგარიშს აბარებს.
