„ევროპის სახალხო პარტიამ“ ვალენსიაში, ყრილობაზე საქართველოს შესახებ რეზოლუცია მიიღო.

რეზოლუციის თანახმად, 2024 წლის 26ოქტომბრის არჩევნების შემდეგ საქართველოში დემოკრატიული უკუსვლა დრამატულად დაჩქარდა, ხოლო ირაკლი კობახიძის მიერ საქართველოს ევროკავშირში ინტეგრაციის პროცესის შეჩერების გამოცხადებამ ქვეყანა სრულმასშტაბურ საკონსტიტუციო, პოლიტიკურ და ადამიანის უფლებათა კრიზისში ჩააგდო.

ტექსტში აღნიშნულია, რომ „დაიწყო ფინანსური ტერორის ახალი ტალღა მომიტინგეებისა და პოლიტიკური ოპონენტების გადაჭარბებული დაჯარიმებით, რის შედეგადაც ჯარიმის საერთო ოდენობამ 18 მილიონ ლარს გადააჭარბა; სრულად გაიყინა ფონდების აქტივები, რომლებიც ეხმარებიან მომიტინგეებს და საჯარო მოხელეებს, რომლებსაც სისტემატურად ათავისუფლებენ სამსახურიდან პროევროპული პროტესტების  გამო.

რეზოლუციის თანახმად, „საქართველოს არალეგიტიმურმა ერთპარტიულმა „პარლამენტმა“ შექმნა საგამოძიებო კომისია, რომელთან თანამშრომლობაზე უარი პატიმრობით დასჯადად გამოაცხადა, რათა დემოკრატიული პოლიტიკური ძალების, კერძოდ კი, „ერთიანი ნაციონალური მოძრაობის“ დევნისთვის სამართლებრივი მექანიზმები იარაღად აქციოს“.

როგორც ტექსტშია ნათქვამი, „საერთაშორისო დაგმობის მიუხედავად, საქართველოს არალეგიტიმურ მთავრობას მართლმსაჯულებისთვის არ გადაუცია არცერთი სამართალდამცველი“. ამასთან, რეზოლუციის თანახმად, „არალეგიტიმურ მთავრობას კვლავ მძევლად ჰყავს 52 პოლიტიკური პატიმარი, მათ შორის დამოუკიდებელი ჟურნალისტი ქალი, მზია ამაღლობელი, რომელსაც ოთხიდან შვიდ წლამდე პატიმრობა ემუქრება“.

რეზოლუციაში ასევე აღნიშნულია, რომ „საქართველოს გლობალურად სანქცირებული სასამართლო კლანის წევრმა, მიხეილ ჯინჯოლიამ გამოიყენა განსაცვიფრებელი სასჯელის მოძველებული ზომა, რათა მიესაჯა 12,5 წლით თავისუფლების აღკვეთა საქართველოს მესამე პრეზიდენტისთვის, მიხეილ სააკაშვილისთვის, რომელმაც უკვე სამი წელი გაატარა პოლიტიკურ პატიმრობაში“.

დოკუმენტში ხაზგასმულია, რომ 2025 წლის 27 იანვარს ევროპულმა საბჭომ მიიღო გადაწყვეტილება, ქართველი დიპლომატებისა და ოფიციალური პირებისთვის  საქართველოსთან ევროკავშირის სავიზო რეჟიმის შემსუბუქების შესახებ შეთანხმების ნაწილის შეჩერების თაობაზე, ხოლო ევროკავშირის რამდენიმე წევრმა ქვეყანამ, მათ შორის ესტონეთმა, ლატვიამ, ლიეტუვამ, პოლონეთმა, გერმანიამ და ჩეხეთმა, დააწესეს სანქციები. როგორც დოკუმენტშია აღნიშნული, „ქართულმა ოცნებამ“ 2025 წლის 29 იანვარს გამოაცხადა, რომ მისი დელეგაცია ევროპის საბჭოს საპარლამენტო ასამბლეიდან გადის მას შემდეგ, რაც PACE-მ მოითხოვა ახალი, ჭეშმარიტად დემოკრატიული საპარლამენტო არჩევნების ჩატარება, პოლიტიკური პატიმრების გათავისუფლება და ძალადობის ჩამდენი პირების პასუხისგებაში მიცემა.

„ზემოთ ჩამოთვლილის გათვალისწინებით, „ევროპის სახალხო პარტია“:

ადასტურებს სოლიდარობას ქართველი ხალხის კანონიერი დემოკრატიული უფლებების და ევროპული მომავლისა და რუსეთის ჰიბრიდული ომის წინააღმდეგ მათი ბრძოლის მიმართ;

გამოთქვამს ღრმა სინანულს, რომ „ქართულმა ოცნებამ“ ვერ გამოიყენა საქართველოსთვის, როგორც კანდიდატი ქვეყნისთვის, მინიჭებული ისტორიული შესაძლებლობა ევროპული ინტეგრაციის გზაზე წინსვლისთვის, აღნიშნავს რა, რომ ევროპულ ინტეგრაციას მოსახლეობის უმრავლესობა უჭერს მხარს;

გმობს „ქართული ოცნების“ ქმედებებს, ავტორიტარიზმში მის მიმდინარე სვლას და გადახრას რუსული ორბიტისკენ და მოითხოვს ყველა პოლიტიკური პატიმრის დაუყოვნებლივ და უპირობო გათავისუფლებას; მოუწოდებს „ქართულ ოცნებას“, დაუყოვნებლივ შეწყვიტოს ყველა რეპრესიული კანონის აღსრულება და შეწყვიტოს საკუთარი მოქალაქეების წინააღმდეგ ტერორი;

გმობს „ქართული ხელისუფლების“ მიერ წარმოებული თავდასხმების კამპანიას ავტორიტეტული სამოქალაქო საზოგადოების ორგანიზაციების, დამოუკიდებელი მედიისა და პოლიტიკური ოპონენტების წინააღმდეგ;

მოითხოვს დამოუკიდებელ, პოლიციის სისასტიკისა და მშვიდობიანი დემონსტრანტების წინააღმდეგ ძალის გადამეტებული გამოყენების გამჭვირვალე და მიუკერძოებელ გამოძიებას  – კანონის წინაშე დამნაშავეთა ანგარიშვალდებულების უზრუნველსაყოფად;

მოუწოდებს „ქართულ ოცნებას“, დაადგინოს კონკრეტული თარიღი ახალი, თავისუფალი, სამართლიანი და კონკურენტული საპარლამენტო არჩევნების ჩასატარებლად, რომლის დროსაც სახელმწიფო ინსტიტუტები, მათ შორის ცენტრალური საარჩევნო კომისია, იფუნქციონირებენ პოლიტიკური ჩარევის გარეშე და არა სახელმწიფოს მიტაცების პირობებში;

მოუწოდებს ევროპულ საბჭოს, საქართველოსთან დაკავშირებით განსაზღვროს და განახორციელოს მკაფიო და თანმიმდევრული  პოლიტიკა ორი ძირითადი პრინციპის ხელმძღვანელობით: რეჟიმის ფინანსური მხარდაჭერის შეწყვეტა, მათ შორის ევროკავშირის წევრი სახელმწიფოების მთავრობების მიერ ყველა შესაბამისი ფინანსური ინსტიტუტისადმი მოთხოვნებით, რომ შეაჩერონ ფინანსური თანამშრომლობა არალეგიტიმურ მთავრობასთან, ვიდრე არ ჩატარდება ახალი საპარლამენტო არჩევნები; რეჟიმის მმართველი, ფინანსური და პროპაგანდისტული ელიტებისთვის სანქციების დაწესება;

მოუწოდებს ევროკომისიას, გადახედოს ევროკავშირ-საქართველოს ასოცირების შეთანხმების განხორციელებას, მე-2 მუხლში შესულ ზოგად პრინციპებთან დაკავშირებით საქართველოს ვალდებულებების დარღვევის გათვალისწინებით, კერძოდ, დემოკრატიული პრინციპების, ადამიანის უფლებებისა და ფუნდამენტური თავისუფლებების პატივისცემის;

მიესალმება საბჭოს გადაწყვეტილებას, პირველ ნაბიჯად შეაჩეროს უვიზო მიმოსვლა ქართველი დიპლომატებისა და ოფიციალური პირებისთვის და ხაზს უსვამს, რომ „ქართული ოცნება“ სრულად არის პასუხისმგებელი შედეგებზე საქართველოს მოქალაქეებისთვის უვიზო რეჟიმის შესაძლო შეჩერებასთან დაკავშირებით, თუ დემოკრატიული მმართველობისა და თავისუფლებების შესაბამისი კრიტერიუმები და სტანდარტები არ იქნება დაკმაყოფილებული;

მოუწოდებს ევროკავშირის ყველა წევრ სახელმწიფოსა და თანამოაზრე საერთაშორისო პარტნიორებს, დაუყოვნებლივ შემოიღონ კოორდინირებული ორმხრივი პირადი სანქციები ბიძინა ივანიშვილის, მისი ოჯახის წევრების, კომპანიებისა და ხელშემწყობთა ქსელის წინააღმდეგ და გაყინონ ივანიშვილის ყველა აქტივი ევროკავშირის ფარგლებში; მოუწოდებს ევროპულ საბჭოს, განახორციელოს აუცილებელი ზომები ივანიშვილის ბანკი „ქართუს“ SWIFT-ისა და Visa/MasterCard-ის ქსელებიდან გათიშვისთვის და დააწესოს სექტორული სანქციები იმ ბიზნესების წინააღმდეგ, რომლებიც მხარს უჭერენ რეჟიმს, განსაკუთრებით მათ, რომლებიც სპილენძის მადნებთან და ფერად ლითონებთან დაკავშირებით საქმიანობენ;

მოუწოდებს ევროკავშირსა და მის წევრ სახელმწიფოებს, დააწესონ კოორდინირებული ორმხრივი პირადი სანქციები იმ ოფიციალური პირებისა და პოლიტიკური ლიდერების წინააღმდეგ, რომლებიც პასუხისმგებელი არიან დემოკრატიის უკუსვლაზე, საარჩევნო გაყალბებაზე, ადამიანის უფლებების დარღვევებზე, პოლიტიკური ოპონენტების, აქტივისტების დევნაზე და გაავრცელონ ეს სანქციები მოსამართლეებზე, რომლებსაც პოლიტიკურად მოტივირებული განაჩენები გამოაქვთ, სამართალდამცველებზე და ფინანსურ ხელშემწყობებზე, რომლებიც ფარულად ან ღიად უჭერენ მხარს რეჟიმს, და რეჟიმთან დაახლოებული მედიასაშუალებების მფლობელებზე;

მიესალმება კომისიის გადაწყვეტილებას, შეწყვიტოს ყველა საბიუჯეტო მხარდაჭერა ქართული ხელისუფლებისთვის და მოუწოდებს ევროპულ საბჭოს, იმუშაოს  ევროკავშირის შესაბამის ინსტიტუტებთან ერთად, რათა უზრუნველყოს, რომ ის 120 მილიონი ევრო, რომელიც შეჩერებულია, როგორც ევროკავშირის ფინანსური დახმარება საქართველოს მთავრობისთვის, სწრაფად იქნას რესტრუქტურიზებული და გადამისამართებული სამოქალაქო საზოგადოებისა და დამოუკიდებელი მედია ორგანიზაციების მხარდასაჭერად საქართველოში; ხაზს უსვამს სამოქალაქო საზოგადოების მხარდაჭერის სასწრაფო საჭიროებას მზარდი რეპრესიებისა და აშშ-ის საერთაშორისო განვითარების სააგენტოს (USAID) საქმიანობის შეჩერების ფონზე;

მოუწოდებს ევროკავშირსა და მის წევრ სახელმწიფოებს, ასევე ეროვნულ პარლამენტებსა და საპარლამენტთაშორისო ინსტიტუტებს, არ ცნონ „ქართული ოცნების“ ერთპარტიული პარლამენტის ან მის მიერ დანიშნული პრეზიდენტის ლეგიტიმურობა და აღიარონ პრეზიდენტი სალომე ზურაბიშვილი, როგორც ქართველი ხალხის ერთადერთი ლეგიტიმური წარმომადგენელი“, – ნათქვამია „ევროპის სახალხო პარტიის“ რეზოლუციაში.