ქართული მხარე "დომოდედოვოს" აეროპორტში მომხდარ ტერაქტს კიდევ ერთხელ ეხმაურება და მკაცრად გმობს.
როგორც ჟურნალისტებს აღნიშნულ საკითხზე კომენტირებისას სს მინისტრმა გრიგოლ ვაშაძემ განუცხადა, ტერაქტს არავითარი გამართლება არ აქვთ და ის დანაშაულებრივ აქტს წარმოადგენს.
"მე ვარ საქართველოს საგარეო საქმეთა მინისტრი და ზოგადად მომხდართან დაკავშირებით შეფასებას ვერ გავაკეთებ. ჩვენ მხოლოდ თანაგრძნობა შეგვიძლია გამოვუცხადოთ დაღუპულთა და დაშავებულთა ოჯახებს. რაც შეეხება იმას, რომ ტერაქტში შესაძლოა ჩრდილოკავკასიელების კვალი გამოიკვეთოს, არ ვაპირებ არავის სპეკულაციაში ჩართვას, მაგრამ ზოგადად ტერაქტს არავითარი გამართლება არ აქვს და ის ნებისმიერ შემთხვევაში დანაშაულებრივ აქტს წარმოადგენს", - განმარტა ვაშაძემ.
შეგახსენებთ, რომ რუსეთში "დომოდედოვოს" აეროპორტში აფეთქება 24 იანვარს მოხდა. მას 35 ადამიანი ემსხვერპლა, 110-მდე კი ჰოსპიტალიზირებულია.
