საპარლამენტო უმრავლესობა პრეზიდენტ სააკაშვილის ტელეხიდით კმაყოფილია.
როგორც ჟურნალისტებს აღნიშნულ საკითხზე კომენტირებისას დეპუტატმა ლაშა თორდიამ განუმარტა, საქართველოს პირველმა პირმა ქვეყნის პოლიტიკური კურსის შესახებ თავისი ხედვა ნათლად ჩამოაყალიბა.
"ეს კურსი მდგომარეობს იმაში, რომ მდგომარეობა შევუმსუბუქოთ საზოგადოების იმ ნაწილს, რომელსაც ძალიან უჭირს. რაც შეეხება საგარეო პოლიტიკურ კურსს, არ არსებობს ისტორიაში არც ერთი ოკუპირებულად აღიარებული ქვეყანა, რომელიც ამ სტატუსით დიდხანს დარჩენილიყო", - განმარტა თორდიამ.
ამასთან, მოსახლეობასა და ქვეყნის პირველ პირს შორის გუშინ გამართულ ტელეხიდზე კომენტარი გააკეთა უმრავლესობის კიდევ ერთმა წარმომადგენელმა ნუგზარ წიკლაურმა, რომლის შეფასებითაც, პრეზიდენტმა Aძირითად ღირებულებებზე აქცენტები სწორად გააკეთა.
"მნიშვნელოვანი იყო ის, რომ მასწავლებელი უნდა იქცეს ცენტრალურ ფიგურად განათლების სისტემაში. ასევე აღინიშნა ეკონომიკური სტაბილურობისა და ინფრასტრუქტურული პროექტების განხორციელების შეუქცევადობა. ძალიან მნიშვნელოვანი იყო როგორც საქართველოს, როგორც კავკასიის რეგიონის ცენტრისა და ლიდერის ფუნქციის გაფართოებისა და როლის გაზრდის აუცილებლობაზე აქცენტის გაკეთებაც", - დასძინა წიკლაურმა.
შეგახსენებთ, რომ საქართველოს პრეზიდენტი გუშინ მოსახლეობისა და ჟურნალისტების შეკითხვებს პირდაპი ეთერში თითქმის სამი საათი პასუხობდა.