საქართველოს პრეზიდენტი მიხეილ სააკაშვილი "კავკასიის პირველი საინფორმაციოს" პირდაპირ ეთერში სვანეთის აღმშენებლობის თემას გამოეხმაურა და მესტიაში შეკრებილ მოსახლეობას მომავალი გეგმები გააცნო.
მისი თქმით, სვანეთის ტურისტული პოტენციალი წარმოუდგენლად დიდია და რაც გაკეთდა, ზღვაში წვეთია. პრეზიდენტის სიტყვით, შარშან სვანეთმა დაახლოებით 30 ათასამდე უცხოელი მიიღო, თუმცა სამომავლოდ 300 ათასი უცხოელის ჩამოსვლას ვარაუდობს. მისი აზრით, საამისოდ ადგილობრივ მოსახლეობას არც სურსათი ეყოფა და არც მოსახლეობა, რადგან სულ 12 ათასიAადამიანი ცხოვრობს მესტიაში.
პრეზიდენტის დაპირებით, ზუგდიდიდან მიმავალი გზის მშენებლობა ზაფხულში უნდა დასრულდეს.
"ეს წარმოუდგენელი სილამაზის გზა იქნება. შვეიცარიის საუკეთესო ადგილების კონკურენტია და ალბათ სჯობს კიდეც. წელს უშგულის გზაზე ვიწყებთ მოსამზადებელ სამუშაოს, რაც, ალბათ, 2012 წელს დამთავრდება. რაც შეეხება გვირაბს, რაც ლენტეხიდან უნდა გაიჭრას ზემო სვანეთში, ამას უნდა დაგეგმარება, ამის ფული ჯერ არ გვაქვს, მაგრამ ვფიქრობ, ორ წელიწადში იქნება ამის ფინანსური საშუალება", _ აცხადებს სააკაშვილი.
მისი თქმით, მესტიის მუზეუმის რეაბილიტაციისთვის 4 მილიონი ლარი გამოიყო. პრეზიდენტის დაპირებით, "სიღნაღიზაცია" რასაც ჰქვია, მესტია ბევრად უკეთესად გაკეთდება, ვიდრე საქართველოს სხვა ქალაქები. ამასთან, მარტო კოშკები კი არ განათდება, არამედ მთელი მესტია სხვანაირი იქნება.
პრეზიდენტი სვანეთის საუკეთესო კლიმატითაც მოხიბლულია.
"250 კილომეტრი ტრასებია მარტო, გუდაურში არის სულ 25 კილომეტრი და გუდაური მიიჩნევა მსოფლიო ბრენდად. "ნიუ-იორკ თაიმსმა" მესტია შეიყვანა მეექვსე ტურისტული დანიშნულების ადგილად, რომელიც აუცილებლად უნდა ნახოს მსოფლიომ", _ აღნიშნა სააკაშვილმა.
მისი თქმით, ადგილობრივი სკოლის მოსწავლეებისთვის ინგლისური მასწავლებლები უკვე აიყვანეს, ამჟამად კი იტალიურის მასწავლებლების ჯერია. ამასთან, თხილამურებსაც ურიგებენ იქაურებს.
"სვანეთში ვინც დარჩა, არ ინანებს. ასეთი ნიჭიერი ხალხი იშვიათად მინახავს. როგორ მივედით აქამდე _ დავბომბეთ ეწერი, აფრასიძეები მოვაშორეთ, რეკეტიორები დავიჭირეთ, რომლებიც ინვესტორებს სძალავდნენ ფულს", _ აღნიშნა პრეზიდენტმა.
