ისრაელზე ტერორისტების მიერ 7 ოქტომბრის თავდასხმის შემდეგ კონფლიქტის ზონასთან ახლოს მდებარე სდოთ ნეგევის რეგიონი (1 საათის სავალი თელ ავივიდან) მსოფლიოს წამყვანი სახელმწიფოების ყურადღების ცენტრშია. 18-მა ქვეყანამ უკვე გამოთქვა სდოთ ნეგევის 18 დასახლებასთან დაძმობილების სურვილი. ამ საკითხზე ისრაელში ქნესეთის წევრებთან გამართულ შეხვედრაზე, რომელშიც „ისრაელის სახლის“ ხელმძღვანელი იციკ მოშეც მონაწილეობდა, გადაწყდა, რომ დაძმობილების პირველი მემორანდუმი გაფორმდება საქართველოში, კერძოდ, მცხეთის რაიონის სოფელ საგურამოსთან.
ამ საკითხთან დაკავშირებით თბილისს და მცხეთას სტუმრობდნენ სდოთ ნეგევის საკრებულოს წევრი აბრაამ დავიდ ტაიები და დასახლება შოკედის ხელმძღვანელი ბიტონ ხენი. მათ შეხვედრა გამართეს თბილისში „ ისრაელის სახლში“ და მცხეთაში, ქალაქის მერთან დიმიტრი ზურაბიშვილთან. მერმა სტუმრებს მცხეთის მუნიციპალიტეტში შემავალი 62 დასახლების შესახებ პრეზენტაცია გამართა; ისაუბრეს ისტორიულ კავშირებსა და მომავალ თანამშრომლობაზე.
შეხვედაში მონაწილეობდა „ისრაელის სახლის“ ხელმძღვანელი იციკ მოშე. მისი თქმით, „ისრაელის სახლი“ ინიციატივაა, რომ საგურამო გახდეს სდოთ ნეგევის დაძმობილებული სოფელი. კავშირებზე ზრუნვა ორგანიზაციის საქმიანობის ერთ-ერთი მთავარი მიმართულებაა, რომელიც მიზნად ისახავს ისრაელთან მეგობარი ქვეყნების კულტურის, ეკონომიკის და ჰუმანიტარული თანამშრომლობის გაღმავებას.
მცხეთის მერთან შეხვედრაზე გადაწყდა, რომ ქართული დელეგაცია ასევე ეწვევა ისრაელს.
ისრაელელი სტუმრები ეწვივნენ, აგრეთვე, საქართველოს უნივერსიტეტსაც, სადაც პროფესორებმა ცირა ჩიკვაიძემ და ლალი ფირცხალავამ სტუდენტებთან ერთად, „ისრაელის სახლთან“ თანამშრომლობით შექმნილი ისრაელის კაბინეტი დაათვალიერებინეს. შეხვედრაზე სტუმრებმა სტუდენტებს 7 ოქტომბრის ტრაგედიის შესახებ უამბეს და მათ შეკითხვებსაც უპასუხეს.
სდოთ ნეგევის წარმომადგენლებს საქართველოს პარლამენტში ისრაელის ქნესეთთან მეგობრობის ჯგუფის ხელმძღვანელმა გივი მიქანაძემაც უმასპინძლა. საუბარი ორმხრივ თანამშრომლობას შეეხო. მიქანაძის თქმით, ის მზად არის, ხელი შეუწყოს ქართველი და ისრაელელი ახალგაზრდების კავშირების გაღრმავებას, რათა მოხდეს ქვეყნების პირდაპირი წარდგენა.
