"მესაზღვრე, მეტალდეტექტორი, ძაღლები, რომლებიც ყნოსავენ, კამერებით დაკვირვება - ეს არის საშუალება, რომ საზღვარი კარგად გაკონტროლდეს", - განაცხადა საქართველოს პრეზიდენტმა მიხეილ სააკაშვილმა "პირველი კავკასიური საინფორმაციოს" ეთერში, ტელეხიდის დროს, რომლის ფარგლებშიც საქართველოს მოსახლეობის კითხვებს პასუხობდა.
"ადრე ამბობდნენ, რომ ფარღალალა საზღვრებია საქართველოში, თითქოს კარიბჭე იყო აქამდე და ახლა გავაღეთ და შემოდის ყველა, თითქოს იქ არ დგას მესაზღვრე, მეტალოდეტექტორი, ძაღლები, რომლებიც ყნოსავენ და საერთოდ არ ხდება კამერებით დაკვირვება. რა თქმა უნდა, ეს არის საშუალება, რომ საზღვარი კარგად გაკონტროლდეს", _ განაცხადა პრეზიდენტმა.
მისი თქმით, უკვე შემოვიდა რამდენიმე ათეული ათასი ადამიანი, - "ერთი ინცინდენტის შესახებ მაინც ვინმეს რამე სმენია?".
"ეს ხალხი იქცევა ძალიან კარგად ჯერჯერობით. როცა ქვეყანაში არის კლიმატი არა ისეთი, როგორც იქ იციან. იქ არის ჯუნგლების პრინციპი. გეტოდ არის ქცეული ჩრდილოეთ კავკასია. რა თქმა უნდა, როცა ადამიანი შემოდის ქვეყანაში, სადაც არის კანონის უზენაესობა, სხვანაირად იქცევა. მათთვის კარგად ცხოვრების სტანდარტი არის ის, რომ ქუჩაში არ მოგიტაცებენ, არ გაგაუპატიურებენ, არ მოგაჭრიან თავს და არ გადაგაგდებენ სადღაც გზაზე. ეს იქ ხდება ყოველდღიურად", _ განაცხადა საქართველოს პრეზიდენტმა დასძინა, რომ მას ეკითხებიან, რად უნდა ჩრდილოკავკასიელი ხალხი. "ვპასუხობ: შემდეგ ჯერზე რომ 50 ათას ჩეჩენს გამოგვიგზავნის ჩვენი მეგობარი ვლადიმერი, თქვენი ჯარისკაცები ჩამოვლენ და დაგვიცავენ მათგან? ჩვენ ეხლა უნდა ვიმუშაოთ, რომ ეს არ მოხდეს. ერთიან კავკასიაში არ ვგულისხმობ საზღვრების მოშლას. კავკასიის ქედი არის გაყოფილი და მშვენიერი ბუნებრივი საზღვარი. ჩვენ ვგმობთ ტერორიზმსა და ძალადობას", _ განაცხადა სააკაშვილმა.
