რუსი პოლიტიკოსები, რომლებიც აცხადებენ, რომ საქართველო უყვართ, რუკაზე ხომ არ დაგვიხატავენ შემთხვევით, რომელ საქართველოზე საუბრობენ? - ეს შეკითხვა დასვა საქართველოს პრეზიდენტმა მიხეილ სააკაშვილმა "პირველი კავკასიური საინფორმაციოს" ეთერში, ტელეხიდის დროს, რომლის ფარგლებშიც საქართველოს მოსახლეობის კითხვებს პასუხობდა.
"დღესაც გამოდიან რუსეთის ხელმძღვანელები და აცხადებენ, რომ საქართველოსთან გვინდა კარგი ურთიერთობები. პუტინი პრიმაკოვის დაბადების დღეზე გადაწვება და "თბილისოს მოისმენს" - უტყუარი ტესტია, ქართველები როგორ უყვარს. ხანდახან რამდენიმე ათას კაცს დაბომბავს და რამდენიმე ასეულ ბავშვს მოკლავს, მაგრამ უყვარს "თბილისო", უყვარს დაბადების დღეზე. როცა იძახიან, გვინდა საქართველოსთან კარგი ურთიერთობებიო, აქ არის ჩამჭრელი ტესტკითხვები, რომელიც ჩვენს ნაციონალ მოღალატეებს ალბათ არ დაუსვამთ - საქართველო რა არის მათთვის? რუკაზე ხომ არ დაგვიხატავენ შემთხვევით? და აქ არის გაჭედვა", _ აცხადებს საქართველოს პრეზიდენტი და ხაზგასმით აღნიშნავს, რომ ის საქართველო, რომელზედაც ისინი საუბრობენ, არის ის, რაც არის ჯერ კიდევ, ვიდრე ბოლომდე არ "შესლანსლავენ".
"ჩამოდიან კულტურის მოღვაწეები და იძლევიან ინტერვიუებს, თუმცა კულტურის მოღვაწეც არის და კულტურის მოღვაწეც, მაგალითად, ნეკრასოვი დიდი რეჟისორია და ძალიან დიდი რუსია. არის ბევრი წესიერი ადამიანი, მაგრამ ამბობენ, იქ პოლიტიკოსებმა აურიეს, ჩვენ კი საქართველო და ქართველი ხალხი ძალიან გვიყვარსო, მაგრამ აქ არის ჩამჭრელი კითხვა - აფხაზეთი არის თუ არა საქართველო? მიხალკოვმა თქვა ამას წინათ, ბაღაფშთან მისულმა, - ჩემი აგარაკი უკან მომეციო. ჩვენი მიწის წამღები მიხალკოვი, რომელიც აცხადებს, რომ ქართველი ხალხი ძალიან უყვარს - ტუჩებში კი არ უნდა კოცნო სადღეგრძელოებით, უნდა დაუსვა მარტივი კითხვა და თუ გეტყვის, რომ აფხაზეთი საქართველოა, მაშინ გადაეხვიო და აკოცო. მაგრამ ხომ იცით, რომ ამას არ გეტყვით", _ აცხადებს საქართველოს პრეზიდენტი და დასძენს, რომ საქართველომ თავი არ უნდა მოიტყუოს.
"თავს ნუ მოვიტუყებთ. არსებობს ლიმიტები დღეს, რომელსაც ან უნდა დავნებდეთ, ან ჩვენ შევქმნათ ისეთი ქვეყანა, რომ ერთხელ და სამუდამოდ გავიდეთ ამ ჩამორჩენილი ფეოდალური წყობიდან", _ აცხადებს სააკაშვილი.
