"არც ერთ ადამიანთან არ მაქვს ისეთი სრული სოლიდარობისა და სრული გაიგივების განცდა, როგორიც დევნილებთან. სანამ ერთი ადამიანი მაინც არის დევნილი, საქართველო სრულფასოვან და ბედნიერ ქვეყანად ვერ ჩაითვლება. პირადად მე ვარ უბედური, ყოველდღე იმ აზრით ვიღვიძებ, რომ ვარ გამწარებული, გაბრაზებული და თავს ვგრძნობ სახლიდან გამოგდებულად. აფხაზეთი ჩემი სახლია, ჩემი მიწებია ცხინვალის ხეობაში, რომელიც ახლა მათი ჩექმის ქვეშაა", _ განაცხადა საქართველოს პრეზიდენტმა ტელეკომპანია "პირველი საინფორმაციო კავკასიურის" პირდაპირ ეთერში მას შემდეგ, რაც ჟურნალისტი დევნილების თბილისიდან გასახლების თემით დაინტერესდა.

პრეზიდენტის თქმით, მას დევნილებისთვის არაერთი ცრემლი დაუღვრია და ეს არ ყოფილა სპეციალურად კამერების წინ დადგმული სცენები. რაც შეეხება 2008 წლის საპრეზიდენტო დაპირებას, რომ მომავალ წელს დევნილები სოხუმში შეხვდებოდნენ, პრეზიდენტმა ებრაელების გამოთქმა გაიხსენა _ მომავალ წელს იერუსალიმში.

"ყველა ქართველმა და მრავალეთნიკური საქართველოს ხალხმა _ მათ შორის, თავისი სახლიდან გამოყრილმა ბერძენმა, სომეხმა, უკრაინელმა, ესტონელმა _ უნდა თქვას: მომავალ წელს სოხუმში. ახლაც გავიმეორებ: მომავალ წელს სოხუმში და ამას გავიმეორებ მანამ, სანამ არ დავბრუნდებით. ესაა ჩვენი აღთქმული მიწა. საქართველოს ყველაზე საუკეთესო ნაწილი იქიდან გამოყრილია", _ აცხადებს პრეზიდენტი.

მისი თქმით, 2008 წლის ომის შემდეგ მსოფლიოს არც ერთ ქვეყანაში ასეთი სწრაფი პროგრამა ვერ განხორციელდებოდა. სააკაშვილის სიტყვით, მიუხედავად იმისა, რომ ზოგიერთებს მიაჩნდათ, რა შუაში იყო შსს მინისტრი, ეს საკითხი ვანო მერაბიშვილს ჩააბარეს და, მართლაც, სამ თვეში ააშენეს სახლები.

პრეზიდენტი აცხადებს, რომ დევნილთა ნაწილმა მიიღო კომპენსაცია, ნაწილს სახლი აუშენეს, ზოგიერთების ოჯახები კი გაიყვნენ და გაიყარნენ. ამიტომ ამ საკითხთან ინდივიდუალური მიდგომაა საჭირო.

"10 ათასმა ადამიანმა დაიკანონა თბილისში ბინები, ეს არის მათი საკუთრება. მაგრამ თქმა იმისა, რომ მათ პრობლემას თბილისის ცენტრში რომელიმე დაწესებულებაში შესახლება გადაწყვეტს და შვილებს ეტყვიან, რომ გაიზრდებიან თბილისის რომელიმე სახელმწიფო ან კერძო დაწესებულებაში, ეს არ მოხდება. თავს ნუ მოვიტყუებთ. ეს არ ხდება არსად და არ მოხდება საქართველოში", _ აღნიშნა პრეზიდენტმა.

მისი თქმით, ფოთსა თუ წყალტუბოში, სადაც დევნილებს მოუწევთ ცხოვრება, ყველგან სამუშაო ადგილები იქმნება.

"მესამე განკარგულება მაქვს გაცემული, რომ ვიწყებთ მშენებლობას ანაკლიასა და ფოთს შორის ზონაში, ბათუმში შენდება მთელი რაიონი, შენდება ყველგან, სადაც ახლა ინტენსიურად იქმნება სამუშაო ადგილები", - განაცხადა სააკაშვილმა.

პრეზიდენტის სიტყვით, იმის გამო, რომ ხელისუფლებას სასტუმროების აშენება ეჩქარებოდა, ხალხმა იაფად იყიდა ბინები ჭიათურის, საჩხერის რაიონებში. ამიტომ დღესდღეობით, თუნდაც ბათუმის სერვისსექტორში, სამუშაო გამოცდილებასთან დაკავშირებით, კატასტროფული ვითარება შეიქმნა. სააკაშვილის აზრით, თავის დროზე დევნილები არ უნდა გაეშვათ, სწორედ ამიტომაც, სამუშაო სექტორში ხალხის ნაკლებობა შეინიშნება.

პრეზიდენტის თქმით, მან ამ შეცდომაზე უკვე ისწავლა. ამიტომ უდიდეს იმედს ამყარებს დევნილებზე, როგორც მშრომელ, ნიჭიერ ხალხზე.

"ესაა რესურსი, რომ სანამ ეს ხალხი თავის სახლებში დაბრუნდება, მანამდე ნიჭსა და შრომას თავისი ქვეყნის განვითარებას მოახმარს _ ვაჭრობაში, ტურიზმში, მეცნიერებაში, მედიცინაში. ყველა ასეთ დასახლებას მოჰყვება სამუშაო ადგილი", _ განაცხადა მან.

პრეზიდენტმა შეახსენა მოსახლეობას, რომ წეროვანსა და მის შემოგარენში რამდენიმე საწარმო თავად გახსნა. მათ შორის, "ბარამბო", რომელიც "ზოგიერთებს ბარამიძისა და ბოკერიას ქარხანა ჰგონიათ", ხორცკომბინატი, სარეცხი ფხვნილების გამოშვების ქარხანა.

"ეს სწორედ იმის გამო მოხდა, რომ ხალხი დასაქმებულიყო", _ აცხადებს სააკაშვილი.