საქართველოს პრეზიდენტ მიხეილ სააკაშვილის თქმით, საქართველოში დაზღვევა არაა, ისეთი როგორიც უნდა იყოს. როგორც პრეზიდენტმა განაცხადა, სადაზღვევო კომპანიების მარჟა არის მაღალი და ამის დარეგულირება უნდა მოხდეს. ამის შესახებ სააკაშვილმა ტელეკომპანია "პირველი საინფორმაციო კავკასიურის" პირდაპირ ეთერში, პროექტში "პრეზიდენტი პასუხობს ხალხს", ერთ-ერთი მოქალაქის შეკითხვაზე პასუხის გაცემისას განაცხადა.
"მილიონი ადამიანი საქართველოში არის დაზღვეული სამედიცინო კუთხით. აქვს დახმარება, რომ შიმშილის საკითხი მაინც არ წარმოიშვას. ჩვენი დაზღვევა, სამწუხაროდ, არ არის ისეთი, როგორიც უნდა იყოს. ჩვენ შემოვიღეთ იაფი დაზღვევის პროგრამა, მაგრამ პრობლემა არის ის, რომ ინსულტზე მკურნალობას 500 ლარი უნდა და დაზღვევა ფარავს 1000 ლარს. ანუ ამის მერე ავადმყოფი უნდა გაიწეროს და ბუნებრივია 2 დღეში ვერ გამოდის ადამიანი ინსულტიდან. ბრმა ნაწლავის ოპერაციას ან ფეხის მოტეხას ფარავს, მაგრამ ამის იქით არ ფარავს და არ ფარავს წინასწარ შემოწმებებს. პროფილაქტიკა არის ყველანაირი პრევენციების მთავარი თემა. ამას უნდა დრო", - განაცხადა პრეზიდენტმა.
სააკაშვილის თქმით, ხალხის უმეტესობა დაზღვევაზე ფიქრობს და სახელმწიფოს მხრიდან ეს განხორციელდა მილიონ ადამიანზე.
"იქმნება სადაზღვევო ისტორია. ხალხის უმეტესობა დაზღვევაზე ფიქრობს და სახელმწიფოს მხრიდან ეს განხორციელდა მილიონ ადამიანზე. სადაზღვევო ისტორიების გაზრდასთან ერთად სადაზღვევო კომპანიები გაძლიერდნენ და ამას მოჰყვა დაზღვევის გაიაფება. ჩემი ვარაუდით, ამას დასჭირდება კიდევ 2-3 წელი. უნდა ითქვას, რომ სადაზღვევო კომპანიების მარჟა არის მაღალი. ამასაც უნდა სერიოზული გადახედვა და რეგულირება", - განმარტავს პრეზიდენტი.
