მიხეილ სააკაშვილის თქმით, მაღალმთიანი აჭარა სოციალური გაჭირვების რეგიონად რჩება, სადაც ბევრი მრავალშვილიანი ოჯახი სიღარიბეში ცხოვრობს. ამის შესახებ პრეზიდენტმა ტელეკომპანია "პირველი საინფორმაციო კავკასიურის" პირდაპირ ეთერში ერთ-ერთი მოქალაქის შეკითხვაზე პასუხის გაცემისას განაცხადა.
პრეზიდენტი აცხადებს, რომ მართალია, მაღალმთიან აჭარაში შემცირდა სიღარიბის დონე, ასევე, ბავშვებისა და დედების სიკვდილიანობა, მაგრამ პრობლემა მაინც რჩება.
"ამ ხალხის ნაწილი სამუშაოს ბათუმში მშენებლობების ხარჯზე პოულობს. ყველა ძირითადი სასტუმროს ბრენდებია ბათუმში თავმოყრილი _ "ჰილტონი" შემოდის, რომელიც მომავალ წელს მთავრდება, "ჰაიატი". ამდენი ბრენდი მოსკოვში არ არის. ამ ყველაფერს აშენებს ჩვენი ხალხი, მათ შორის, მთიდან ჩამოსული მშრომელები", _ აღნიშნა სააკაშვილმა.
მისი თქმით, ერთ-ერთ მთავარ პრობლემად გზების გაყვანა რჩება, რისთვისაც ხელისუფლებამ მილენიუმის უსასყიდლო დახმარებით ისარგებლა. მილენიუმის პროექტით მიღებული თანხა დაიხარჯება იმ გზაზე, რომელიც გოდერძის უღელტეხილს მთიან აჭარასა და სამცხე-ჯავახეთთან შეაერთებს. პრეზიდენტის თქმით, სომხებს მიჰყავთ ავტობანი საზღვართან და საზღვარი უნდა იყოს სწრაფად გამავალი, რაც ტურისტების დ რაოდენობის გაზრდას გამოიწვევს. ეს გზა აღარ იქნება ჩიხი.
საქართველოს პრეზიდენტი მაღალმთიანი აჭარის ღირსებებსაც შეეხო. "სათხილამურო კურორტი ჩემი ახირება არ არის. უბრალოდ, მსიამოვნებს, რომ ამ კუთხეში მაღალშემოსავლიანი ტურიზმი იქნება. ჩვენთან უფრო კარგი კლიმატური პირობებია. ავაშენეთ ერთი სათხილამურო ზონა, რომელიც დაგვიბომბეს კოდორის ხეობაში. გვაქვს სვანეთში ასეთი სკოლა, რამდენიმეს ვაკეთებთ ეწერში. გვაქვს აჭარაში და მეორე გაკეთდა ზუსტად ადიგენსა და ხულოს შორის. კეთდება 5 კმ სიგრძის ორი საბაგირო".
პრეზიდენტის თქმით, უკვე მოძებნილია კერძო ინვესტორები, რომლებიც ამას გააკეთებენ და ამ ადგილებზე დასაქმდებიან ადამიანები. "ეს არის ერთ-ერთი საშუალება, რომ ეს ღვთისგან მივიწყებული რეგიონი უზრუნველყოფილ მომავლს დაუკავშირდეს", _ აღნიშნა პრეზიდენტმა.
პრეზიდენტი მიიჩნევს, რომ საქართველოში მაღალი ხარისხის თოვლია, ისეთი, როგორიც შეიძლება იყოს ამერიკაში ან "ერთგან ევროპაში". პრეზიდენტი დარწმუნებულია, რომ აჭარაში სათხილამურო კურორტის განვითარების შედეგად ხულო ჩიხიდან გამოვა.
