ბაქო-თბილისი-ყარსის ქართული მონაკვეთის მშენებლობისათვის და მისი ექსპლუატაციაში შესვლისათვის დამატებით 500-600 მლნ. დოლარია საჭირო, ამის შესახებ განცხადება აზერბაიჯანის ტრანსპორტის მინისტრმა ზია მამედოვმა გაკეთა.
ქართული მხარე აზერბაიჯანთან დამატებითი თანხის გამოყოფაზე ინტენსიურ მოლაპარაკებებს უკვე აწარმოებს, თუმცა რა მოცულობის კრედიტს გამოგვიყოფს აზერბაიჯანი, ამ დროსათვის დაუზუსტებულია.
"დამატებითი დაფინანსების თემასთან დაკავშირებით, მინისტრების დონეზე კონსულტაციები უკვე ჩავატარეთ და ამის შესახებ პრეზიდენტმა შესაბამისი დავალებაც მოგვცა. მიმაჩნია, რომ ეს არის ბუნებრივი პროცესი, რადგანაც ცხოვრება იცვლება, იცვლება შეღავათები და საკრედიტო ურთიერთობები. ვაპირებთ საპროცენტო განაკვეთის გადახედვას და როცა ამის შესახებ საბოლოო გადაწყვეტილება იქნება მიღებული აუცილებლად შეიტყობთ", - განაცხადა ზია მამედოვმა.
ბაქო-თბილისი-ყარსის ქართული მონაკვეთის მშენებლობისათვის, აზერბაიჯანის მთავრობამ 200 მლნ. დოლარი რამდენიმე წლის უკან გამოყო, საიდანაც 100 მლნ უკვე ათვისებულია.
როგორც დღეს თბილისში ბაქო-თბილისი-ყარსის სარკინიგზო ხაზის პროექტის განხორციელებასთან დაკავშირებით საკოორდინაციო საბჭოს შეხვედრის წინ აზერბაიჯანის ტრანსპორტის მინისტრმა განმარტა, მიმდინარე საკითხებთან ერთად საკოორდინაციო ჯგუფის შეხვედრაზე სარკინიგზო მაგისტრალის მშენებლობის 2011 წლის ბიუჯეტის საკითხები განიხილება.
"საქართველოში ჩამოვედით იმისათვის, რომ ბაქო-თბილისი-ყარსის სარკინიგზო მაგისტრალის პროექტი განვიხილოთ. ცნობილია, რომ ეს არის ძალიან მნიშვნელოვანი პროექტი, რომელსაც დიდი ეკონომიკური მნიშვნელობა აქვს. აზერბაიჯანისა და საქართველოს სახლემწიფოთა მეთაურები დიდ ყურადღებას უთმობენ ამ პროექტს და მის ბიუჯეტს. ამჯერად ჩვენ ჩამოვედით იმისათვის, რომ 2011 წლის ბიუჯეტი განვიხილოთ, რათა დავამტკიცოთ ფინანსური შესაძლებლობები. 2011 წელს აზერბაიჯანის მთავრობა, უკვე დამტკიცებული 200 მლნ-დან 100 მლნ-ს გამოყოფს"- განაცხადა ზია მამედოვმა.
უკვე ცნობილია, რომ პროექტის ფარგლებში, ახალქალაქის სადგურის მშენებლობისათვის რამდენიმე ასეული მილიონი დოლარი გახდება საჭირო.
"ჩვენ ვაშენებთ საკმაოდ სწრაფი ტემპებით და მშენებლობის ტემპი მარაბდა-კარწახის რკინიგზაზე კიდევ უფრო გაიზარდა. აზერბაიჯანულ მხარესთან ერთად მშენებლობასთან დაკავშირებული ტექნიკური საკითხები გავიარეთ და სამომავლო გეგმები დავსახეთ. 2012 წელი ეს არის გარდამტეხი წელი, როცა მშენებლობა უნდა დასრულდეს. ვისაუბრეთ ასევე ახალქალაქის რკინიგზის სადგურის მშენბლობაზე, რომელიც რამოდენიმე ასეული მილიონი დაჯდბა"- განაცხადა საქართველოს რეგიონალური განვითარებისა და ინფრასტრუქტურის მინისტრმა რამაზ ნიკოლაიშვილმა.
25 იანვარს, მინისტერიალის პირველ დღეს, ქართული და აზერბაიჯანული მხარეების მონაწილეობით ორმხრივი შეხვედები მიმდინარეობს. 26 იანვარს კი მინისტერიალის მონაწილეებს თურქული დელეგაციაც შეუერთდება. მხარეები ბაქო-თბილისი-ყარსის სარკინიგზო მაგისტრალის პროექტის ფარგლებში მიმდინარე სამუშაოებს: ყარსი-ახალქალაქის მონაკვეთის რეაბილიტაცია-მშენებლობის, თურქეთისა და საქართველოს საზღვარზე მდებარე 4 კმ-იანი გვირაბის მშენებლობის და საზღვრის გადაკვეთისას საბაჟო და სასაზღვრო პროცედურების გამარტივების საკითხებს განიხილავენ. მხარეები ასევე, რკინიგზის მშენებლობის შემდგომი ეტაპების გეგმებს დასახავენ.
"მარაბდა-თეთრიწყარო-წალკა-ახალქალაქი-კარწახის სარკინიგზო ხაზის" რეაბილიტაცია საქართველოს რეგიონალური განვითარებისა და ინფრასტრუქტურის სამინისტრო ახორციელებს.
საქართველოსა და თურქეთში გამავალი სარკინიგზო მაგისტრალის მთლიანი სიგრძე 245 კმ-ია. აქედან 175 კმ საქართველოს ტერიტორიაზე გადის, ხოლო 70 კმ რკინიგზა გაივლის თურქეთის ტერიტორიაზე.
რეაბილიტაცია უტარდება საქართველოს ტერიტორიაზე გამავალი რკინიგზის 150 კმ-იან მონაკვეთს. აღნიშნულ მონაკვეთზე დაგეგმილია 9 სადგურის განახლება. ახალქალაქი-კარწახის 25 კმ-იან მონაკვეთზე იგება სრულიად ახალი სარკინიგზო ხაზი. აღნიშნულ მონაკვეთზე აშენდება 2 ახალი სადგური და 4 ახალი ხიდი.
თურქეთი-საქართველოს საზღვარზე, კარწახში შენდება 4 კმ-იანი დამაკავშირებელი გვირაბი, რომლის ნახევარიც საქართველოს ტერიტორიაზე გაივლის, ნახევარი კი თურქეთის ტერიტორიაზე.
შეგახსენებთ, რომ ბაქო-თბილისი-ყარსის სარკინიგზო მაგისტრალის პროექტი "ბაქო-თბილისი-ყარსის ახალი სარკინიგზო ხაზის" მშენებლობის შესახებ საქართველოს, აზერბაიჯანისა და თურქეთს შორის გაფორმებული საერთაშორისო შეთანხმების ფარგლებში ხორციელდება და საქართველო-აზერბაიჯანი-თურქეთის, როგორც ინფრატსრუქტურული ასევე რეიგონული მნიშვნელობის თვალსაზრისით უმნიშვნელოვანეს პროექტს წარმოადგენს..