მოსკოვში "დომოდედოვოს" აეროპორტში განხორცილებული ტერაქტი მანეჟის მოედანზე მომხდარი მოვლენების პასუხია.
ამის შესახებ "ჯი-ეიჩ-ენთან" საუბრისას ექსპერტმა სოსო ცინცაძემ, დომოდედოვოს აეროპორტში მომხდარი ტერაქტის შეფასებისას, აღნიშნა.
"უკევ დასახელდა გეოგრაფიული პუნქტი, საიდანაც შეიძლება წამოასულიყო ეს ტერორისტული აქტი - ეს არის ჩრდილოეთ კავკასია და არ არის გასაკვირი, რომ თვითონ ჩრდილოეთ კავაკასია, ფაქტია ნაკლები მსხვერპლით, მაგრამ ტერორიზმის ბუდედ იქცა. თუმცა, აქ მთავარია გამომწვევი მიზეზები იმ ტერორისტული აქტებისა, რომელიც ხორციელდება ჩრდილოეთ კავკასიაში და დროდადრო რუსეთში. ყველაფერი ეს გამოწვეულია რუსეთის პოლიტიკისა და მისი მართველობის არაეფექტურობით", - აღნიშნა ცინცაძემ.
მისივე შეფასებით, რუსეთის ხელისუფლება ქვეყანაში ელემენტარულ წესრიგსაც კი ვერ უზრუნველყოფს და როგორც რუსი ექსპერტები ამბებოენ, აეროპორტები "проходной двор"-დაა ქცეული.
"რუსეთი სანამ არ შეცვლის ეროვნულ პოლიტიკას ჩრდილოეთ კავკასიაში და იქნება ასეთი წმინდა რასისტული და ფაშისტური იდეოლოგიის ცხოვრებაში გატარების რეციდივები, ტერორისტული აქტები ყოველთვის იქნება, რადგან "კამიკაძეების" წინააღმდეგ ეფექტური ბრძოლის მეთოდიკა მსოფლიოში ჯერ არავის არ გამოუგონია. აშშ-საც კი არ გააჩნია 100% დამცავი მექანიზმი ასეთი ტერორისტული აქტების წინააღმდეგ", - აღნიშნა "ჯი-ეიჩ-ენთან" საუბრიასას ცინცაძემ და დასძინა, ფანატიკოსებად არ იბადებიან, ფანატიკოსებად გარკვეული მიზეზების გამო შემდეგ ხდებიან.
მისივე თქმით, როდესაც ჩრდილოეთ კავკასიაში ადგილი აქვს თვითაფეთქებებს, როგორც იყო ერაყში, ამას რეალური მიზეზი გააჩნია და ძლიერი სახელმწიფოები ებრძვიან შედეგს და არა მიზეზს, რაც საბოლოო ჯამში არაეფექტურია.
"ის რაც მოხდა მანეჟის მოედანზე, როდესაც რუსმა ნაციონალისტებმა დაარბიეს ჩრდილოკავკასიელები და საფეხბურთო კლუბ "სპარტაკის" დაღუპული გულშემატკივრის საფლავზე ვლადიმერ პუტინი მივიდა თეატრალიზებულად, ეს ყველაფერი არის შედეგი არის იმისა, რაც მან შექმნა 8-10 წლის წინ, როდესაც თქვა, რომ "ტუალეტებში ამოვხოცავ. ეს არის ყველაფერი ამის შედეგი. მაგრამ აქ უსამართლობა ის არის, რომ რუსული ნაციონალიზმის აყვავების შედეგად უდანაშაულო ადამიანები იღუპებიან", - დასძიანა მან.
შეგახსენებთო, რომ მოსკოვის "დომოდედოვოს" აეროპორტში გუშინ თვითმკვლელმა ტერორისტმა თავი აიფეთქა, რის შედეგადაც ოფიციალური მონაცემებით 35 დაიღუპა და 110 ადამიანი დაიჭრა.
