რუსეთი ძალიან სერიოზული პრობლემების წინაშე დგას და ამის ნათელი მაგალითია ბოლო დროს განვითარებული მოვლენები.
ამის შესახებ "ჯი-ეიჩ-ენს" კონფლიქტებისა და მოლაპარაკების საერთაშორისო კვლევითი ცენტრის დირექტორმა გიორგი ხუციშვილმა მოსკოვის "დომოდედოვოს" აეროპორტში გუშინ მომხდარი ტერაქტის შეფასებისას განუცხადა.
ექსპერტის შეფასებით, საუბარი იმაზე, რომ ტერორისტული აქტის კვალი ჩრდილოკავკასიელებზე გადის, ჯერ ნაადრევია, თუმცა არც გამორიცხულია.
"ასეთ შემთხვევაში ძნელია რაიმე მინიშნების გაკეთება. არ გამოვრიცხავ იმას, რომ ეს შეიძლება იყოს დაკავშირებული იმ დაპირისპირებებთან, რომელიც მოსკოვში ეთნიკურ ნიადაგზე ხდება. ამას გამოძიება სჭირდება. ასეთ შემთხვევაში ძნელია დაადო ხელი და თქვა, რომ ეს ჩეჩნების გაკეთებულია ეთნიკურ ნიადაგზე აღმოცენებულ დაპირისპირებასთან დაკავშირებით, რომელიც რამდენიმე ხნის წინ იყო. თუმცა, ამას ვერ გამოვრიცხავ, სანამ არ იქნება რაიმე კვალი აღმოჩენილი, ვინმე თავის თავზე არ აიღებს, ან რაიმე ჯგუფთან კავშირი არ დადგინდება იქამდე პირდაპირი მინიშნების გაკეთება არ შეიძლება", - აღნიშნა ხუციშვილმა და აქვე დასძინა, რომ არ არის გამორიცხული ტერორისტული აქტის რომელიმე უცხოური დაჯგუფების მიერ იყო ორგანიზებული.
მისივე შეფასებით, რუსეთში ამ დროისთვის ძალიან რთული ვითარება და არიან ჯგუფები, რომლებიც ცდილობენ გარკვეული დაძაბულობა შეიტანონ.
"ის, რაც მანამდე კავკასიელებთან მიმართებაში ხდებოდა, ისე იყო გაპიარებული და ისეთი შთაბეჭდილება რჩებოდა, რომ მის გაპიარებით თავად ხელისუფლება არის დაინტერესებული იმისთვის, რომ კავკასიელების წინააღმდეგ შემდეგ რაღაც ზომები მიიღონ, მოსკოვში შეავიწროვონ და გააძევონ. მაგრამ გუშინ მომხდარი ტერაქტს პირდაპირ ამ მოვლენებს ვერ დაუკავშირებ. ეს შეიძლება განიხილოს ერთ-ერთ შესაძლო სცენარად", - აღნიშნა "ჯი-ეიჩ-ენთან" საუბრისას ექსპერტმა.
ამასთან, ხუციშვილის თქმით, ტერორისტული აქტები ვისგანაც არ უნდა მომდინარეობდეს, უნდა იყოს დაგმობილი, გამოძიებული და დამნაშავენი დასჯილები, რადგან ტერორიზმი არც ერთ ქვეყანაში არც ერთ შემთხვევაში არ შეიძლება იყოს გამართლებული. ტერორიზმი მიზნად ისახავს უდანაშაულო ადამიანების შეჩევას სამიზნეებად, რომ ქვეყანაში დესტაბილიზაცია შექმნან.
შეგახსენებთო, რომ მოსკოვის "დომოდედოვოს" აეროპორტში გუშინ თვითმკვლელმა ტერორისტმა თავი აიფეთქა, რის შედეგადაც ოფიციალური მონაცემებით 35 დაიღუპა და 110 ადამიანი დაიჭრა.
