რუსეთის საგარეო საქმეთა მინისტრ სერგეი ლავროვსა და აშშ-ს სახელმწიფო მდივანს, მარკო რუბიოს შორის სატელეფონო საუბარი შედგა.
რუსული საგენტო „ტასის“ ცნობით, საუბარი ამერიკული მხარის ინიციატივით შედგა.
როგორც რუსეთის საგარეო საქმეთა სამინისტროში განაცხადეს, საუბრისას გამოიკვეთა ორმხრივი სურვილი თანამშრომლობის მიმართ მიმდინარე საერთაშორისო საკითხებზე, მათ შორის უკრაინის, პალესტინის და ზოგადად ახლო აღმოსავლეთისა და სხვა რეგიონული ტერიტორიების გარშემო არსებული ვითარება.
რუსეთის საგარეო საქმეთა სამინისტროში ასევე განაცხადეს, რომ მხარეები შეთანხმდნენ "უახლოეს მომავალში მოაწყონ ექსპერტთა შეხვედრა, რათა კოორდინაცია გაუწიონ კონკრეტულ ნაბიჯებს საზღვარგარეთ რუსეთისა და აშშ-ის მისიების მუშაობაში დაბრკოლებების ურთიერთგაგების მიზნით".
ცნობისთვის, 12 თებერვალს აშშ-ს პრეზიდენტმა, დონალდ ტრამპმა სოციალურ ქსელში დაწერა, რომ პუტინთან ხანგრძლივი, პროდუქტიული სატელეფონო საუბარი ჰქონდა. ამავე დღეს ტრამპმა განაცხადა, რომ რუსეთ-უკრაინის ომის დასრულებაზე მოლაპარაკებების გამართვის მიზნით რუსეთის პრეზიდენტს, ვლადიმირ პუტინს, საუდის არაბეთში შეხვდება.
პუტინთან საუბრის შემდეგ ტრამპმა სატელეფონო საუბარი გამართა უკრაინის პრეზიდენტ ვოლოდიმირ ზელენსკისთანაც. ზელენსკის თქმით, აშშ-ს პრეზიდენტთან მშვიდობის მიღწევის შესაძლებლობებზე და ერთად მუშაობის მზადყოფნაზე ისაუბრა.
