ამაზე მძიმე რეზოლუცია წარმოუდგენელია. ახლა დარჩა ორი რამ: აღსრულება ბრიუსელში და პროტესტის გაძლიერება და გაფართოება საქართველოში. დარწმუნებული ვარ რომ ასეც იქნება, - ამის შესახებ კოალიცია „ცვლილებისთვის“ ლიდერმა, ნიკა გვარამიამ ევროპარლამენტის მიერ საქართველოზე მიღებულ რეზოლუციაზე.
"ინტერპარტიული ჯგუფის მიერ შესწორებები ყველა გავიდა, გარდა იმისა რასაც სპეკულირებს "იმედი", რომ თითქოს ინიციატივა იყო პრო-„სამთავრობო“. ამაზე მძიმე რეზოლუცია წარმოუდგენელია. ახლა დარჩა ორი რამ: აღსრულება ბრიუსელში და პროტესტის გაძლიერება და გაფართოება საქართველოში. დარწმუნებული ვარ რომ ასეც იქნება.
მნიშვნელოვანია ეკონომიკური სანქციები, განსაკუთრებით დიდი ბრიტანეთის და აშშ-ის მხრიდან. ევროპაში უკვე არის საუბარი იმაზე, რომ თუ ერთიანი სანქცია ვერ იქნა ევროკავშირის მხრიდან, მოგეხსენებათ უნგრეთის და სლოვაკეთის პრობლემა, იქნება ცალკეული ქვეყნების სანქციები. შეგახსენებთ, რომ ივანიშვილს ქონება აქვს საფრანგეთშიც, რომლის მოქალაქესაც ის წარმოადგენს საქართველოსთან ერთად.
ასე რომ ძალიან მნიშვნელოვანი გადაწყვეტილებაა, ძალიან მნიშვნელოვანი ერთსულოვნებაა. ვფიქრობ ამაში ძალიან დიდი წვლილი შეიტანა ქართველი ხალხის ნებამ და რუსთაველზე გამართულმა პროტესტებმა და ბევრი ვიმუშავეთ ჩვენ ოპოზიციონერებმაც, ვინც აქ ვიყავით და კოლეგებმაც თბილისიდან, ყველა თავის პარტიულ ჯგუფს ეკონტაქტა და მივიღეთ ის შედეგი რაც მივიღეთ. ერთიანობით ჩვენ შეგვიძლია ყველაფერი, ხალხის, პოლიტიკური პარტიების, არასამთავრობოების და არ გამომრჩეს მედიის როლი, რომელიც მათ შორის ევროპარლამენტშია აღიარებული.
ერთად შევძელით. ეს მოხდა ევროპარლამენტში, ევროსაბჭოშიც და რაც მთავარია მოხდება საქართველოში," - განაცხადა ნიკა გვარამიამ.
დღეს, 13 თებერვალს, ევროპარლამენტმა მიიღო რეზოლუცია, რომელიც ბიძინა ივანიშვილის მთავრობას დე ფაქტოსა და თვითგამოცხადებულს უწოდებს, არ ცნობს მას და ლეგიტიმურ პრეზიდენტად სალომე ზურაბიშვილს მიიჩნევს. ამას გარდა, რეზოლუცია ივანიშვილის რეჟიმს პოლიტპატიმრების გათავისუფლებას, საპროტესტო აქციებზე ძალადობის შემთხვევების გამოძიებასა და ახალი არჩევნების დანიშვნას მოუწოდებს.
