უკრაინის პრეზიდენტმა ვოლოდიმირ ზელენსკიმ განაცხადა, რომ ამერიკის პრეზიდენტს დონალდ ტრამპს ჯერ არ აქვს ოფიციალური გეგმა უკრაინასა და რუსეთს შორის ომის დასრულებასთან დაკავშირებით.
„ის, რაც წერია ამა თუ იმ პუბლიკაციებში... დარწმუნებული ვარ, რომ ეს არ არის პრეზიდენტ ტრამპის ოფიციალური გეგმა“, – განაცხადა მან.
უკრაინის პრეზიდენტმა აღნიშნა, რომ გეგმის ხედვა უკვე აქვს და კონკრეტული საკითხები ამერიკულ მხარესთან ტრამპის ინაუგურაციამდეც განიხილებოდა.
გარდა ამისა, ზელენსკიმ ასევე გამოთქვა რწმენა, რომ უკრაინის და ამერიკის გუნდები ერთად იმუშავებენ.
„არ შეიძლება არსებობდეს არავისგან განცალკევებული გეგმა, თუნდაც შეერთებული შტატებისგან“, - აღნიშნა მან.
უკრაინის პრეზიდენტმა გამოთქვა რწმენა, რომ პოტენციურ გეგმასთან დაკავშირებით ბევრი ინფორმაცია იქნება "კიევში და არა კიევში", სადღაც ეს შეიძლება ემთხვეოდეს რეალობას, მაგრამ უმეტეს შემთხვევაში ასე არ იქნება.
„ჩვენ კვლავ დაველოდებით ჩვენს ოფიციალურ მოლაპარაკებებს და ოფიციალურ შედეგებს“, - თქვა ზელენსკიმ.
შეგახსენებთ, 5 თებერვალს, Bloomberg-ის წყაროებმა განაცხადეს, რომ ტრამპის ადმინისტრაცია მომავალ კვირას მიუნხენის უსაფრთხოების კონფერენციაზე წარადგენს გეგმას რუსეთის წინააღმდეგ ომის დასრულების შესახებ.
თუმცა აშშ-ის პრეზიდენტის დონალდ ტრამპის სპეციალურმა წარმომადგენელმა უკრაინასა და რუსეთში კიტ კელოგმა განაცხადა, რომ 14-16 თებერვალს მიუნხენის უსაფრთხოების კონფერენციაზე ტრამპი არ წარადგენს სამშვიდობო გეგმას.
