დღეიდან საშვილოსნოს ყელის კიბოს პრევენციის მეხუთე კვირეული იწყება. როგორც "ჯი-ეიჩ-ენს" საშვილოსნოს ყელის კიბოს ევროპის ასოციაციიდან აცნობეს, კვირეული ასოციაციის ქართულ ინსტიტუციურ წევრებთან ერთად მიმდინარეობს.
მათივე განმარტებით, კვირეულის მიზანია, ხელი შეუწყოს მოსახლეობაში ინფორმირებულობის დონის ამაღლებას დაავადების შესახებ და წაახალისოს ორგანიზებული სკრინინგ პროგრამების განხორციელება/გაფართოება და მათში ქალების ჩართულობა. დაავადებას მსოფლიო მასშტაბით მეორე ადგილი უკავია ქალებში გავრცელებულ სიმსივნეებს შორის. საშვილოსნოს ყელის კიბოს იწვევს ადამიანის პაპილომა ვირუსი, რომელიც სქესობრივი გზით გადაიცემა.
"მკაფიოდ არის ჩამოყალიბებული აზრი იმის შესახებ, რომ საშვილოსნოს ყელის კიბოს სკრინინგის ორგანიზებული პროგრამები შემთხვევათა 80 პროცენტის პრევენციას ახდენენ. ამასთანავე, ჩვენს ხელთ არსებობს ორი ვაქცინა, რომლებიც ძალზედ ეფექტურად იცავენ ადამიანს კიბოს გამომწვევი ტიპის პაპილომავირუსისგან," - აცხადებს სანდრა ელისაბედ რულოვსი, საქართველოს პირველი ლედი, საშვილოსნოს ყელის კიბოს ევროპის ასოციაციის პრეზიდენტი.
2007 წლიდან პრევენციის კვირეული ყოველწლიურად იმართება და ამასთანავე იზრდება მისი მასშტაბებიც - 2010 წლის იანვარში 450 ღონისძიება ჩატარდა ევროპის 28 ქვეყანაში. პრევენციის კვირეულის წარმატებამ ბოლო 4 წლის განვმალობაში წელსაც უბიძგა საშვილოსნოს ყელის კიბოს ევროპის ასოციაციას, და შემდეგი ორგანიზაციების ჩართულობას საშვილოსნოს ყელის კიბოს პრევენციის მეხუთე კვირეულის ჩასატარებლად: ევროპის კიბოს ორგანიზაცია, კიბოს ლიგების ევროპულ ასოციაცია, საერთაშორისო კავშირი კიბოს წინააღმდეგ, პოლიტიკოსები საშვილოსნოს ყელის კიბოს პრევენციისათვის.
აღსანიშნავია, რომ საინფორმაციო და საგანმანათლებლო ღონისძიებებთან ერთად იგეგმება სიბრძნის მარგალიტის, როგორც საშვილოსნოს ყელის კიბოს პრევენციის კამპანიის სიმბოლოს პოპულარიზაცია. პარარელულარდ, მიმდინარეობს ხელმოწერების შეგროვება პეტიციაზე - "შეაჩერე საშვილოსნოს ყელის კიბო ევროპაში".
გაცნობებთ, რომ დაავადების რისკების შემცირების მიზნით, 2008 წლიდან საქართველოს რეპროდუქციული ჯანრმთელობის ეროვნული საბჭოს ინიციატივით ჩამოყალიბდა ეროვნული სკრინინგ (შემოწმების) ცენტრი, რომელიც ახორციელებს ძუძუსა და საშვილოსნოს ყელის კიბოს პრევენციის პროგრამებს. საშვილოსნოს ყელის კიბოს პრევენციის პროგრამა ხორციელდება თბილისის მერიისა და გაეროს მოსახლეობის ფონდის მხარდაჭერით დედაქალაქში მაცხოვრებელი 26 დან 60 წლამდე ასაკის ქალბატონებისათვის.
საშვილოსნოს ყელის კიბოს პრევენციის თითოეული ჩატარებული კვირეულის შესახებ ანგარიშები შეგიძლიათ იხილოთ საშვილოსნოს ყელის კიბოს ევროპის ასოციაციის ვებ-საიტზე: წწწ.ეცცა.ინფო
კვირეული 29 იანვრამდე გაგრძელდება.
