"კონსერვატიული პარტიის" წევრის ლაშა ჩხარტიშვილის განცხადებით, დევნილების მდგომარეობა კატასტროფულია.
"უკანასკნელი სამი ღამეა, რაც 11 ობიექტი დევნილებისგან დაცალეს. ოფიციალური მონაცემებით, გასახლებულთა რიცხვი 1000-მდეა. სინამდვილეში, არაოფიციალურად, 2 ათასი დევნილი გაასახლეს. დაახლოებით ამდენივე რაოდენობის დევნილს კი გასახლებას უპირებენ,"_აცხადებს ლაშა ჩხარტიშვილი "ჯი-ეიჩ-ენთან" კომენტირებისას.
მისი ინფორმაციით, პოლიციელების მხრიდან დევნილების აყვანა შეგნებულად ხდებოდა, რათა ამით დევნილები დაშინებულიყვნენ. ჩხარტიშვილის განმარტებით, დევნილთა სამოქალაქო მოძრაობის ლიდერი მანუჩარ სიგუა და "თავისუფალი საქართველოს" წევრი გია ყრუაშვილი 14 დღით დააპატიმრეს, ხოლო სამ დევნილ ქალბატონს ჯარიმები უკანონოდ დააკისრეს.
ლაშა ჩხარტიშვილი აცხადებს, რომ თბილისელებსა და დევნილებს შორის სოლიდარობის გრძნობა დაბალია.
"დევნილების შემდეგ თბილისელებს მიადგებიან და დავალიანების გამო მათ ქონებასაც დააყადაღებენ. თუ თბილისელებმა დევნილები არ დაიცვეს, ხვალ მათი რიგი დადგება,"_აღნიშნავს ლაშა ჩხარტიშვილი.
მისი თქმით, პრეზიდენტის ავლაბრის რეზიდენციისკენ წასვლა იმიტომ გადაწყვიტეს, რათა სააკაშვილის უზარმაზარი შენობის წინ დააფიქსირონ, რომ ასობით ოთახის მქონე პრეზიდენტს დევნილებისთვის არაფერი ემეტება.
