საქართველო და სომხეთი ორი სახელმწიფოს მშვიდობისა და კეთილდღეობისათვის უნდა მუშაობდნენ. თბილისმა და ერევანმა უნდა გააკეთონ ყველაფერი შესაძლებელი იმისათვის, რომ ორმხრივი ურთიერთობები ორ ქვეყანას შორის კიდევ უფრო გამყარდეს, _ ეს განცხადება სომხეთში სამუშაო ვიზიტით მყოფმა საქართველოს პრეზიდენტმა მიხეილ სააკაშვილმა მათემატიკაში სომხურ-ქართული ოლიმპიადის დახურვაზე გააკეთა.
"მე არც თუ ისე ხშირად შემხვედრია ამდენი ჭკვიანი თვალები ერთ აუდიტორიაში", _ განაცხადა მიხეილ სააკაშვილმა ოლიმპიადის გამარჯვებულების დაჯილდოებისას, რომლებსაც ორი ქვეყნის პრეზიდენტებმა ნოუთბუკები აჩუქეს.
საქართველოს პრეზიდენტმა სომეხ და ქართველ მოსწავლეებს ურჩია არ დაივიწყონ საკუთარი ენა, მაგრამ უცხო ენებიც შეისწავლონ.
"საქართველოში პირველი უცხო ენა ამ დროისათვის ინგლისურია. დარწმუნებული ვარ, რომ ამგვარი ტენდენცია სომხეთშიც არის", _ განაცხადა მიხეილ სააკაშვილმა და პირობა დადო, რომ დააწესებს 10 საპრეზიდენტო პრემიას, რომლის მიხედვითაც სომეხ მოსწავლეებს საქართველოს უმაღლეს სასწავლებლებში სწავლა შეეძლებათ.
საქართველოს პრეზიდენტმა ასევე განაცხადა, რომ შემდეგი სომხურ-ქართული ოლიმპიადა საქართველოში - თბილისში, ბათუმში ან ქუთაისში ჩატარდება.
