2011 წლის მარტის ბოლომდე ტექნიკური დარგების განვითარებისა და სკოლებში საბუნებისმეტყველო საგნების სწავლების დონის ამაღლების მიზნით, 450 ლაბორატორია 150 სკოლაში გადანაწილდება, ხოლო ახალი სასწავლო წლიდან ფიზიკის, ქიმიისა და ბიოლოგიის თანამედროვე ლაბორატორიებით ყველა სკოლა ეტაპობრივად აღიჭურვება.
სკოლების ლაბორატორიებით აღჭურვის პარალელურად მიმდინარეობს მასწავლებლების გადამზადების პროცესიც, რომლის ფარგლებშიც დღეს, საქართველოს განათლებისა და მეცნიერების სამინისტროში ფიზიკის, ქიმიისა და ბიოლოგიის მასწავლებლებს ტრენინგი ჩაუტარდათ.
მასწავლებელთა პროფესიული განვითარების ეროვნული ცენტრის ტრენერებმა მასწავლებლებს გააცნეს თანამედროვე ლაბორატორიის შესაძლებლობები. იგი სამი სრული კომპლექტისაგან შედგება. თითოეულში, საგნის (ფიზიკა, ქიმია, ბიოლოგია) მიხედვით, 18 ქვეკომპლექტია გაერთიანებული.
თანამედროვე ხელსაწყოები და აპარატურა პედაგოგებს დაეხმარებათ უფრო საინტერესო და სახალისო გახადონ საბუნებისმეტყველო დისციპლინების სწავლების პროცესი. უახლესი ტექნოლოგიებით აღჭურვილი ლაბორატორიები ხელს შეუწყობს. მოსწავლეთა კვლევითი უნარ-ჩვევების განვითარებას.
ტრენინგს განათლებისა და მეცნიერების მინისტრი დიმიტრი შაშკინი დაესწრო. მინისტრის განცხადებით, მიმდინარე სასწავლო წელს პროგრამა ,,აინშტაინის'' ფარგლებში საჯარო სკოლები საერთაშორისო სტანდარტების თანამედროვე ლაბორატორიებით აღიჭურვება. ამ მხრივ, აუცილებელია, პედაგოგების გადამზადება და მათთვის ლაბორატორიების გამოყენების სწავლება.
პრეზიდენტის ინიციატივით, ახალი ლაბორატორიების გამოყენებით სხვადასხვა კონკურსები ჩატარდება. საუკეთესო გამოგონების ავტორი მოსწავლეები კი წახალისდებიან.
შესაბამისი ინფრასტრუქტურის დანერგვის პარალელურად, საბუნებისმეტყველო საგნების მასწავლებლებს ტრენინგები მთელი საქართველოს მასშტაბით განხორციელდება.
შეგახსნებთ, რომ გუშინ სოფელ ჯუგაანში ახალდ გახსნილი საჯარო სკოლის დათვალიერებისას საქართველოს პრეზიდენტმა მიხეილ სააკაშვილმა განათლებისა და მეცნიერების მინისტრს დიმიტრი შაშკინს დავალება მისცა სკოლებში გამომგონებელთა კონკურსების ჩატარება დაიწყონ.
