დღეს "საქართველოს ლეგიონის" ოფისში ვეტერანთა აქციის დარბევის სამართლიანი შეფასების განხილვა გაიმართა. განხილვაში მონაწილეობას იღებდნენ საერთაშორისო სამართლის ექსპერტები_მინდია უგრეხელიძე და თეა წულუკიანი, ასევე, პარლამენტის ადამიანის უფლებათა დაცვის კომიტეტის თავმჯდომარის მოადგილე დიმიტრი ლორთქიფანიძე, "ქართული ლეგიონის" ხელმძღვანელი გიორგი ყარყარაშვილი, სამოქალაქო მოძრაობა "სოლიდარობა უკანონო პატიმრებს" ლიდერი ეკა ბესელია, საქართელოს ადვოკატთა ასოციაციის ხელმძღვანელი ზაზა ხატიაშვილი და სხვანი.
ფაქტობრივი გარემოებებიდან გამომდინარე, ექსპერტები მიიჩნევენ, რომ რომ ვეტერანთა აქცია პირველივე დღიდან კანონიერად მიმდინარეობდა.
"აქციის მონაწილეებს გზის სავალი ნაწილი მცირე ხნით რომ გადაეკეტათ და მოქალაქეთა ცხოვრების ჩვეული რიტმი დაერღვიათ, ევროპული პრეცენდენტის თანახმად, გარკვეული დროის მანძილზე ხელისუფლების ორგანოებს მაინც შეწყნარების ვალდებულება ექნებოდათ. ამ დროს კი ვეტერანებს კანონი არ დაურღვევიათ,"_ნათქვამია ექსპერტთა მიერ გაკეთებულ დასკვნაში.
ვეტერანთა უფლებების დამცველების თქმით, ეროვნული უშიშროების ან საზოგადოებრივი უსაფრთოების ინტერესთა დაცვის მიზნითაც კი აქციის დაშლის საშიშროება არ არსებობდა.
ამდენად ექსპერტები მიიჩნევენ, რომ ვეტერანთა დარბევით დაირღვა ევროპული კონვენციის მე-11 მუხლი.
ამასთან, მათი აზრით, 2011 წლის 4 იანვრის სასამართლო დადგენილება მხარეთა თანასწორობისა და მართლმსაჯულების პრინციპთა დარღვევით ჩატარდა. მეტიც, მოსამართლეს საერთოდ არ გამოუკვლევია აქციის კანონიერებისა და მისი დაშლის ლეგიტიმურობის საკითხები.
"სასამართლომ არ გაიზიარა ვეტერანთა და დაცვის მოწმეთა ჩვენებები და განმარტებები. სამაგიეროდ, მან გაიზიარა მეორე მხარის_პოლიციელა არგუმენტები და ვეტერანები წვრილმან ხულიგნობაში დაადანაშაულა,"_აღნიშნულია ვეტერანთა განცხადებაში.
ექსპერტები არ გამორიცხავენ, რომ სიმართლის დასადგენად სტრასბურგის სასამართლოსაც მიმართონ.
შეგახსენებთ, 2011 წლის 3 იანვარს ქართველმა სამართალდამცავებმა გმირთა მემორიალთან მიმდინარე ვეტერანთა მშვიდობიანი აქცია ძალის გამოყენებით დაშალეს.
