სამართალდამცველების მიერ დაკავებული დევნილები ადმინისტრაციულ სასამართლოში გადაიყვანეს. როგორც "ჯი-ეიჩ-ენს" "კონსერვატიული პარტიის" ლიდერმა კახა კუკავამ განუცხადა, მათ, სავარაუდოდ, ადმინისტრაციული წესით გაასამართლებენ.
კუკავას განმარტებით, ამ დროისთვის სასამართლოში ჯულიეტა ცინდელიანი, ბელა ხერგიანი და ირინა ფირცხალიანი არიან გადაყვანილნი. იძულებით გადაადგილებული პირების გარდა სასამართლოში გადაიყვანეს დევნილთა სამოქალაქო მოძრაობის ლიდერი მანუჩარ სიგუა და "კონსერვატორების" წარმომადგენელი გია ყრუაშვილიც.
კუკავას თქმით, დაკავებულთა დასახმარებლად ამ წუთებში ადმინისტრაციულ სასამართლოში ადვოკატი მივიდა.
ამასთან, დაუზუსტებელი ინფორმაციით, კიდევ ერთი დევნილი დელიზა იოსელიანი გაათავისუფლეს.
შეგახსენებთ, რომ აღნიშნული პირები დღეს, სტუდქალაქის შენობიდან დევნილთა გამოსახლებისას დააკავეს.