"ქრისტიან-დემოკრატების" ლიდერები ნათლისღების სადღესასწაულო ღვთისმსახურებას ღვთისმშობლის მიძინების სახელობის მანგლისის საეპისკოპოსო ტაძარში დაესწრნენ.
წირვა მანგლისისა და წალკის მიტროპოლიტმა ანანიამ აღავლინა. წირვის შემდეგ მეუფემ გიორგი თარგამაძეს, ლევან ვეფხვაძეს და ნიკა ლალიაშვილს მანგლისში ის ადგილი დაათვალიერებინა, სადაც სასულიერო სასწავლო ცენტრის ამოქმედება იგეგმება.
"მთელს საქართველოს ვულოცავ დღევანდელ დღეს. ჩვენ ნათლისღების დღესასწაულს მანგლისის სიონში შევხვდით. აქ მიტროპოლიტი ანანია ღვთისმსახურებასთან ერთად მნიშვნელოვან სამეცნიერო და საგანმანათლებლო საქმიანობასაც ეწევა, რისთვისაც დიდ მადლობას ვუხდით და ყველას მოვუწოდებთ გვერდში დავუდგეთ მეუფეს საშვილიშვილო საქმის განხორციელებაში" - განაცხადა გიორგი თარგამაძემ.