სომეხმა ეპისკოპოსმა საქართველოს პრეზიდენტი მიხეილ სააკაშვილი დავით აღმაშენებელს შეადარა.
"ჩვენთვის დიდი პატივია, რომ ამ მნიშვნელოვან დღეს ჩვენს ტაძარს საქართველოს პრეზიდენტი მიხეილ სააკაშვილი ეწვია, ისევე როგორც ამას დავით აღმაშენებელი აკეთებდა. ეს გამოხატავს თქვენს დამოკიდებულებას და პატივისცემას. დავით აღმაშენებელი სტუმრობდა როგორც მუსლიმურ, ასევე ქრისტიანულ სალოცავებს და მოხარული ვარ, რომ ეს ტრადიცია გრძელდება", - განაცხადა თბილისში სომხური სამოციქულო ეკლესიის ეპისკოპოსმა ვაზგენ მირზახანიანმა.
ამასთან, მან ყურადღება ქართველ და სომეხ ხალხს შორის ურთიერთობებზე გაამახვილა.
"როგორც საქართველოს კათოლიკოს პატრიარქი აღნიშნავს სომხური სამოციქულო და ქართული მართმადიდებლური ეკლესია ასწლეულების განმავლობაში სრულ ჰარმონიასა და იდილიაში თანაარსებობდნენ. ჩვენი ეკლესიის მრევლს, რომლებიც საუკუნეების განმავლობაში საქართველოს სრულფასოვანი მოქალაქეები არიან, ქვეყნის განვითარებაში საკუთარი წვლილი შეაქვთ", - დასძინა სომხური ეკლესიის ეპისკოპოსმა.
შეგახსენებთ, რომ სომხური სამოციქულო ეკლესია დღეს ქრისტეს შობასა და ნათლისღების დღესასწაულს აღნიშნავს.
აღნიშნულთან დაკავშირებით, პრეზიდენტი მიხეილ სააკაშვილი ავლაბარში მდებარე სომხურ ეკლესიას ეწვია და დღესასწაული მიულოცა.
მასალის გამოყენების პირობები