მოვისმინეთ მიხაელ როთისგან თავდასხმა საქართველოს ეკლესიაზე, ქარაფშუტა პოლიტიკოსები თავს ესხმიან ქართულ ეკლესიას, ვერც აცნობიერებენ, რას უკეთებენ თავის ქვეყანას, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.
პაპუაშვილის თქმით, მნიშვნელოვანია, რომ შესაბამისი ქვეყნისგან მოჰყვეს შეფასება იმ ქმედებას, რაც გუშინ ევროკავშირის ხუთი ქვეყნის წარმომადგენელმა გააკეთა.
პარლამენტის თავმჯდომარის განცხადებით, სამწუხაროა ქართულ ეკლესიაზე თავდასხმა.
„ასევე, მოვისმინეთ ბატონი როთისგან თავდასხმა საქართველოს ეკლესიაზე და ეს არის ყველაზე სამწუხარო. იცით, ჩემი განსაკუთრებული კავშირი გერმანულ დახმარებასთან საქართველოში. 30-წლიანი დახმარება საქართველოს მიმართ, რომელიც ქართველი ხალხის მხრიდან იყო პატივცემული ბევრი მიზეზის გამო. ერთი ხელის მოსმით, წყალში ყრიან ასეთი ქარაფშუტა პოლიტიკოსები ამას. თავს ესხმიან ქართულ ეკლესიას, ვერც აცნობიერებენ, რას აკეთებენ ამით, რას უკეთებენ თავის ქვეყანას, მის სახელს საქართველოში, როცა ხელისუფლების წარმომადგენელი ასოცირდება ქართულ ეკლესიაზე თავდასხმაზე და ხალხის მიერ არჩეულ ხელისუფლებაზე თავდასხმაზე. ზუსტად ასეთი ქარაფშუტა პოლიტიკოსები, რომლებსაც ერთი სელფის გადაღების გამო შეუძლიათ, გაწირონ საზოგადოებები დაპირისპირებისკენ და არეულობისკენ, ასეთები არიან, რომლებიც ჩვენ არ გვინდა, გავაიგივოთ ევროპასთან. ამიტომ მნიშვნელოვანია, შესაბამისი შეფასებები მოჰყვეს, მათ შორის მათი პარტიების მხრიდან“, – განაცხადა პაპუაშვილმა.