ნორვეგია უკრაინას საჰაერო თავდაცვის სისტემებისთვის დაახლოებით 7 მილიარდ ნორვეგიულ კრონს (695.7 მლნ დოლარი) გადასცემს.  

ნორვეგიის მთავრობის განცხადებით, საჰაერო თავდაცვის სისტემებს უკრაინას გერმანიიდან გადასცემენ.

 "გერმანია და ნორვეგია მჭიდროდ თანამშრომლობენ, რათა მხარი დაუჭირონ უკრაინას მის ბრძოლაში ქვეყნისა და მშვიდობიანი მოსახლეობის დასაცავად რუსეთის საჰაერო თავდასხმებისგან", - განაცხადა ნორვეგიის პრემიერ-მინისტრმა, იონას გარ სთიორემ.

ნორვეგია და გერმანია აფინანსებენ ორ Patriot-ის ტიპის სისტემას, მათ შორის, მათთვის საჭირო რაკეტებს.

გარდა ამისა, ნორვეგია მონაწილეობს გერმანული მწარმოებლის, Hensoldt-ის საჰაერო თავდაცვის რადიოლოკაციური სადგურებისა და Kongsberg-ის საჰაერო თავდაცვის სისტემების შესყიდვაში.

"საჰაერო თავდაცვა ასევე უმნიშვნელოვანესია სამხედრო დანაყოფებისა და ინფრასტრუქტურის დასაცავად. ახლა, გერმანიასთან ერთად, ჩვენ კიდევ უფრო ვაძლიერებთ ჩვენს ძალისხმევას", - განაცხადა ნორვეგიის თავდაცვის მინისტრმა ტორე ო. სანდვიკმა.

შეგახსენებთ, შეერთებულმა შტატებმა და ნატომ დაიწყეს უკრაინისთვის ამერიკული იარაღის მიწოდების ახალი მექანიზმი (PURL - Priority Ukraine Requirements List),  რომელიც ითვალისწინებს დაფინანსებას ალიანსის სხვა წევრების შენატანებიდან.

PURL-ის ფარგლებში, ნიდერლანდებმა მოამზადა 500 მილიონი დოლარის დახმარების პაკეტი უკრაინისთვის, რომელიც მოიცავს კომპონენტებს და რაკეტებს Patriot-ის საჰაერო თავდაცვის სისტემისთვის .

შვედეთი, ნორვეგია და დანია ერთობლივად გამოყოფენ დაახლოებით 500 მილიონ დოლარს.