გამოძიების მიერ გაშიფრული დანაშულებრივი სქემის მიხედვით, ს/ს „რუსთავგაზს", შპს „მ და ბ"-სა და ს/ს „იტერა-საქართველოს" შორის 2009 წელს გაფორმებული სამმხრივი ხელშეკრულების თანახმად, ს/ს „იტერა-საქართველო" შპს „რუსთავგაზის" შესაბამისი ქსელების მეშვეობით ბუნებრივ აირს აწვდიდა შპს „მ და ბ"-ს. თავის მხრივ, შპს „მ და ბ" აღნიშნული ბუნებრივი აირის რეალიზაციას ავტომობილების გაზგასამართ სადგურზე ახდენდა.

ს/ს „რუსთავგაზი", როგორც ბუნებრივი აირის საექსპლუატაციო ქსელის მფლობელი შპს „მ და ბ"-ს მიერ მოხმარებული ბუნებრივი აირის აღრიცხვიანობას აწარმოებდა სპეციალური კორექტორით. სწორედ მრიცხველზე ასახული მონაცემების მიხედვით უნდა დაგენილიყო ს/ს „იტერა-საქართველოს" მიერ მოწოდებული ბინებრივი აირის ოდენობა, მისი რეალიზაციის მონაცემები და ამის საფუძველზე სახელმწიფო ბიუჯეტთან ანგარიშსწორებას განახორციელებდნენ ს/ს „რუსთავგაზიცა" და შპს „მ და ბ"-ც.

მატერიალური გამორჩენისა და გადასახადებისათვის თავის არიდების მიზნით შპს „მ და ბ"-ს დირექტორი შაქრო მიროტაძე დანაშულებრივად დაუკავშირდა ს/ს „რუსთავგაზის" გენერალური დირექტორის მოადგილეს როსტომ ცერცვაძეს, სამეწარმეო და კომუნალური მომსახურების უბნის უფროსს მურმან პაპუაშვილს და ამავე უბნის უფროს სპეციალისტს გიორგი ეგუტიძეს. ისინი ურთიერთანგარიშსწორების აქტებში დოკუმენტურად ამცირებდნენ შპს „მ და ბ"-ს მიერ რეალურად გახარჯული ბუნებრივი აირის ოდენობას, ხელოვნურად, კომპიუტერული ტექნიკის გამოყენებით ცვლიდნენ მრიცხველებზე დაფიქსირებულ მონაცემებს, რის საფუძველზეც იქმნებოდა ყალბი საგადასახადო დოკუმენტები.

გაირკვა, რომ შპს „მ და ბ"-ს ყოველდღიურად ხარჯავდა დაახლოებით 10-11 000 კუბურ მეტრ ბუნებრივ აირს, საგადასახადო დოკუმენტაციაში კი მხოლოდ 4-5 000 კუბურ მეტრს აფიქსირებდა.
აღნიშნულის გამო მნიშვნელოვანი მატერიალური ზიანი მიადგა როგორც სახელმწიფო ბიუჯეტს, ასევე - ს/ს „იტერა-საქართველოს".
მიმდინარეობს წინასწარი გამოძიება საქართველოს სისხლის სამართლის კოდექსის 210-ე მუხლის მიხედვით, რაც ითვალისწინებს თავისუფლების აღკვეთას ოთხიდან შვიდ წლამდე ვადით.