საქართველოს განათლებისა და მეცნიერების მინისტრის პირველმა მოადგილემ კოკა სეფერთელაძემ და საქართველოს შინაგან საქმეთა მინისტრის პირველმა მოადგილემ ეკა ზღულაძემ "მე მიყვარს ჩემი პოლიცია" კონკურსში გამარჯვებული მოსწავლეები პორტატული კომპიუტერებით, სერტიპიკატებით, დიპლომებითა და ფულადი პრიზებით დააჯილდოვეს.
კონკურსში "მე მიყვარს ჩემი პოლიცია" საქართველოს განათლებისა და მეცნიერების სამინისტრომ შინაგან საქმეთა სამინისტროსთან თანამშრომლობით განახორციელა. თხზულების კონკურსში VI -XII კლასის, ხოლო ფოტოკონკურსში VII-XII კლასის მოსწავლეები მონაწილეობდნენ. ნახატების კონკურსი კი ორ ასაკობრივ ჯგუფში I-VI და VII-XII კლასის მოსწავლეებისთვის ჩატარადა.
კოკა სეფერთელაძემ და ეკა ზღულაძემ დასკვნით ტურში გამარჯვებულები დიპლომებითა და ფულადი პრიზებით დააჯილდოვეს: პირველ ადგილზე გასულები- 700 ლარით, მეორე ადგილზე გასულები -500 ლარით, მესამე ადგილზე გასულები - 300 ლარით.
ნახატების კონკურსში პირველი ადგილი თბილისის # 169 საჯარო სკოლის V კლასის მოსწავლემ მაია ჭანტურიამ და #145 საჯარო სკოლის XI კლასის მოსწავლემ ანა ჯავახაძემ დაიკავეს. თხზულების კონკურსში გამარჯვებული ოზურგეთის #3 საჯარო სკოლის IX კლასის მოსაწვლე დავით შალიკავა გახდა, ხოლო ფოტოკონკურსში თბილისის #168-ე სკოლის მოსწავლე ელენე გლაზოვა.
გამოვლიდნენ საქართველოს განათლებისა და მეცნიერების და შინაგან საქმეთა მინისტრების ფავორიტები, რომლებიც პორტატული კომპიუტერებით დაჯილდოვდნენ. დიმიტრი შაშკინის ფავორიტი ადიგენის რაიონის დაბა აბასთუმნის საჯარო სკოლის მეორე კლასის მოსწავლე დარეჯან ჯაფარიძე, ხოლო ივანე მერაბიშვილის ფავორიტი თბილისის #136-ე საჯარო სკოლის IX კლასის მოსწავლე დიმიტრი ყანჩაველი გახდა.
"განსაკუთრებული პრიზით" კი #141-ე საჯარო სკოლის IX კლასის მოსწავლე ვახტანგ ჭყოიძე დაჯილდოვდა, რომელმაც თხზულებების კონკურსში წარმატებით მიიღო მონაწილეობა.
თხზულებებისა და ნახატების კონკურსები სამ ეტაპს: სასკოლო, რეგიონული და დასკვნით ტურებს მოიცავდა. რეგიონულ ტურში სკოლებმა ორი საუკეთესო ნახატი და თხზულება წარმოადგინეს , რომელთაგან ერთი მასწავლებლებისა და მოსწავლეების მიერ ფარული კენჭისყრით შეირჩა. რეგიონულ ტურში სულ 66-მა ნახატმა და 29 თხზულებამ გაიმარჯვა, რომელთა ავტორებმაც სერთიფიკატები მიიღეს.
