საქართველოში მმართველი პარტია აგრძელებს ქვეყნის ევროპული გზისთვის ძირის გამოთხრას დემოკრატიულ პრინციპებზე, კანონის უზენაესობასა და ფუნდამენტურ უფლებებზე უწყვეტი თავდასხმების გზით, - ამის შესახებ ევროკომისარმა გაფართოების საკითხებში მარტა კოსმა ევროპარლამენტში, 2026 წლის გაფართოების პაკეტის წარდგენისას განაცხადა.
კოსის შეფასებით, საქართველოში სამოქალაქო სივრცე კიდევ უფრო შეიზღუდა, ოპოზიციური პარტიების აკრძალვის მცდელობები კი ქვეყნის დემოკრატიულ საფუძვლებს ემუქრება. ევროკომისარმა აღნიშნა, რომ გაწევრიანების პროცესის ფაქტობრივი შეჩერების პირობებში ევროკავშირის გაფართოების პოლიტიკა საქართველოსთან ურთიერთობის მთავარი ჩარჩო ვეღარ იქნება.
ევროკომისარმა აღნიშნა, რომ არსებული ვითარების შეცვლა საქართველოს ხელისუფლების პასუხისმგებლობაა, თუმცა ქვეყნისთვის ევროკავშირის კარი კვლავ ღია რჩება.
„მთავარი ოპოზიციური პარტიების აკრძალვის მცდელობები სერიოზულ საფრთხეს უქმნის საქართველოს დემოკრატიის საფუძვლებს. ვინაიდან გაწევრიანების პროცესი, ფაქტობრივად, შეჩერებულია, ევროკავშირის გაფართოების პოლიტიკა, ამ ეტაპზე, ვეღარ იქნება ევროკავშირისა და საქართველოს ურთიერთობების ცენტრალური ჩარჩო.
ვითარების შეცვლისა და ახალი ეტაპის დაწყების პასუხისმგებლობა მთლიანად საქართველოს ხელისუფლებას ეკისრება. თუმცა, მინდა ხაზი გავუსვა, რომ საქართველოს ევროპული გზა კვლავ ღიაა, თუკი საქართველოს ხელისუფლება კურსს შეცვლის. ჩვენ მხარს ვუჭერთ ქართველი ხალხის ევროპულ მისწრაფებებს”, - აღნიშნა მარტა კოსმა.
